CƏMİYYƏT
Lənkəranda “Natiqlik məktəbi” layihəsi çərçivəsində ilk təlim sessiyası keçirilmişdir
Lənkəran, 31 oktyabr (AZƏRTAC). Lənkəran şəhərində “Natiqlik məktəbi” layihəsi çərçivəsində “Kəşf olunan innovativ və kreativ gənclik” mövzusunda ilk təlim sessiyası keçirilmişdir.
AZƏRTAC xəbər verir ki, Azərbaycan Respublikasının Prezidenti yanında Gənclər Fondunun maliyyə dəstəyi, Lənkəran Şəhər Gənclər və İdman İdarəsinin təşkilatçılığı ilə keçirilən tədbirin məqsədi regionda yaşayan gənclərdə natiqlik bacarıqlarının inkişaf etdirilməsi, öz fikrini sərbəst və məntiqli ifadə edə bilən gənc nəslin formalaşdırılmasıdır.
Təlim sessiyasında Lənkəran şəhərində yaşayan 25 gənc fəal üçün “Ünsiyyət”, “Natiq auditoriyada”, “Natiqlik sənəti” mövzularında seminarlar təşkil edilmişdir.
Tədbirin sonunda gənc natiqlər növbəti sessiyalarda çıxış etmək üçün mövzular seçərək, ona hazırlaşmaq qaydalarını mənimsəmişlər.
Layihənin rəhbəri Samir Salayev bildirmişdir ki, nəzərdə tutulan növbəti 4 sessiyada natiqlik bacarıqlarına yiyələnmiş gənclərin auditoriya qarşısında çıxışları praktiki surətdə təmin olunacaqdır.