LƏNKƏRANDA YAP GƏNCLƏR BİRLİYİNİN CƏNUB REGİONAL FORUMU KEÇİRİLMİŞDİR
Tədbirin iştirakçıları şəhər icra hakimiyyətində ümummilli liderimiz Heydər Əliyevin büstünün önünə gül-çiçək dəstələri düzmüş, böyük öndərin xatirəsini ehtiramla yad etmişlər.
YAP Gənclər Birliyinin cənub bölgəsinin 7 rayonunu təmsil edən üzvlərinin və Türkiyə Ədalət və İnkişaf Partiyası Gənclər Təşkilatının nümayəndələrinin iştirak etdiyi forumda Lənkəran Şəhər İcra Hakimiyyəti başçısının birinci müavini İlqar Dadaşov çıxış edərək iştirakçıları salamlamış, regionların sosial-iqtisadi inkişafı Dövlət Proqramının icrası istiqamətində Lənkəranda aparılan quruculuq işlərindən danışmış, gənclərin rayonun iqtisadi, ictimai-siyasi, sosial və mədəni həyatdakı fəal mövqeyini yüksək qiymətləndirmişdir.
Forumda YAP Lənkəran, Astara, Yardımlı və Cəlilabad rayon təşkilatları gənclər qurumlarının sədrləri çıxış edərək rəhbərlik etdikləri təşkilatda “Azərbaycan gəncliyi Dövlət Proqramı”nın icrası istiqamətində görülən işlərdən danışmış, gənclərin qayğı və problemləri ilə bağlı təkliflərini bildirmiş, Prezident İlham Əliyevin Azərbaycan gənclərinin forumunda söylədiyi nitqini fəaliyyət proqramı kimi qəbul etdiklərini vurğulamışlar.
Toplantıda Türkiyə Ədalət və İnkişaf Partiyası Gənclər Təşkilatının sədri Hakan Tütünçü çıxış edərək, üzvü olduğu partiyanın rəhbəri, Türkiyənin Baş naziri Rəcəb Tayyib Ərdoğanın səmimi salamlarını tədbir iştirakçılarına çatdırmış, Azərbaycan–Türkiyə əlaqələrinin inkişafında gənclərin rolunu yüksək qiymətləndirmişdir.
Azərbaycanın dövlət müstəqilliyini ilk tanıyan və ona həmişə dəstək olan Türkiyə dövlətinin qurucusu Mustafa Kamal Atatürkün söylədiyi «Azərbaycanın dərdi Türkiyənin dərdi, Türkiyənin dərdi Azərbaycanın dərdidir» ifadəsini xüsüsi vurğulayan qardaş ölkənin təmsilçisi, Bakıda olarkən Şəhidlər xiyabanında dəfn olunmuş azəbaycanlıların və türklərin məzarlarını ziyarət etdiklərini, aprelin 24-də Bakıda Atatürk Mərkəzində YAP Gənclər Birliyi ilə birlikdə ermənilərin qondarma soyqırımı ilə əlaqədar toplantı keçirdiklərini bildirmişdir.
Yeni Azərbaycan Partiyası Gənclər Birliyinin sədri Ramil Həsənov forumda çıxış edərək, tədbirin məqsəd və vəzifələri barədə iştirakçılara məlumat vermiş, 2006-cı ildə bölgələrdə regional forumların keçirilməsinə üstünlük veriləcəyini bildirmiş, regionlarda əlaqələndirmə mərkəzlərinin yaradılmasının zəruriliyini vurğulamışdır.
Forumda YAP Gənclər Birliyinin Cənub Regional Əlaqələndirmə Mərkəzi yaradılmış, İlkin Rəhimov mərkəzin sədri seçilmişdir.
Forumda müzakirə edilən məsələ ilə əlaqədar qətnamə qəbul edilmişdir.
Toplantı iştirakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
