İQTİSADİYYAT
LERİKDƏ ÖTƏN İLİN YEKUNLARI VƏ QARŞIDA DURAN VƏZİFƏLƏR MÜZAKİRƏ EDİLMİŞDİR
Lerik, 12 fevral (AZƏRTAC). Lerik Rayon Mədəniyyət Evində 2009-cu ilin yekunlarına və cari ildə qarşıda duran vəzifələrə həsr olunmuş toplantı keçirilmişdir.
Tədbir iştirakçıları əvvəlcə şəhərin mərkəzi meydanında ümummilli lider Heydər Əliyevin abidəsi önünə gül dəstələri düzərək, xatirəsini ehtiramla yad etmişlər.
Onlar mədəniyyət evinin foyesində rayonda istehsal edilən kənd təsərrüfatı və sənaye məhsullarının sərgisi ilə tanış olmuş, 2009-cu ildə rayonun sosial-iqtisadi inkişafını əks etdirən “Dağların qoynunda yüksələn şəhər” sənədli filminə tamaşa etmişlər.
Hesabat məruzəsi ilə çıxış edən rayon icra hakimiyyətinin başçısı Rövşən Bağırov bildirmişdir ki, ölkəmizdə həyatın bütün sahələrində qazanılan uğurlar, sosial-iqtisadi sahənin dinamik inkişafı Lerikdə də işgüzar mühit yaratmışdır.
Ötən il rayonda ümumi məhsul istehsalı 2008-ci illə müqayisədə 3,2 faiz artmışdır. Bu artım nəqliyyatda 27 faiz, pərakəndə əmtəə dövriyyəsində 4,2 faiz, pullu xidmətlərdə 17,2, tikintidə 2,2 faiz olmuşdur. Əhalinin orta aylıq əmək haqqısı 9,6 faiz artaraq 229 manat, adambaşına düşən gəlirlər 5,6 faiz artaraq 778 manat təşkil etmişdir. Rayonda 512 yeni iş yeri açılmışdır ki, onlardan da 176-sı daimidir.
Hesabat ilində kənd təsərrüfatı sahəsində də artım müşahidə edilmişdir. Hər hektar buğda əkininə görə fermerlərə verilən 80 manat vəsait rayonda taxılçılığın inkişafına müsbət təsir göstərmişdir. Əgər 2008-ci ildə rayonun fermerləri cəmi 1,9 min hektarda buğda əkmişdilərsə, 2009-cu ildə əkin sahələri genişləndirilərək 2,8 min hektara çatdırılmışdır. Yazlıq əkin isə keçən ilə nisbətən 81 hektar artırılaraq 1126 hektar olmuşdur.
Qeyd olunmuşdur ki, hesabat ilində rayonda sosial məsələlərin həllinə də diqqət artırılmış, bir sıra yeni obyektlər istifadəyə verilmişdir.
Rayon mədəniyyət evi, incəsənət məktəbi əsaslı təmir edilmiş, Çayrud kəndində 200 şagird yerlik orta, Hovil kəndində 120 yerlik əsas məktəb binaları inşa edilmişdir.
Regionların sosial-iqtisadi inkişafı Dövlət Proqramında nəzərdə tutulan tədbirlərə müvafiq olaraq rayonda istirahət, turizm-əyləncə mərkəzləri, kərpic və çınqıl zavodu, süfrə suları istehsal edən sexlər istifadəyə verilmişdir.
Sahibkarlıqla məşğul olan fiziki və hüquqi şəxslərə rayonda fəaliyyət göstərən banklar və kredit təşkilatları tərəfindən 710 min manat kredit verilmişdir.
Lerik-Lənkəran yolunun 37-ci kilometrliyində turizm obyektinin, Qosmalyan kəndində “Relax” turizm-istirahət mərkəzinin yeni istirahət yerlərinin, Bilnə kəndində “Səfa” turizm-istirahət mərkəzinin tikintisi davam etdirilir.
Lənkəran-Lerik yolunun Piran kəndindən keçən hissəsində müasir standartlara cavab verən iaşə və ticarət obyektləri inşa olunur.
Qarabağ müharibəsi əlilləri və şəhid ailələri üçün yeni 16 mənzilli yaşayış evinin tikintisində son tamamlanma işləri aparılır. Əmək və Əhalinin Sosial Müdafiəsi Nazirliyi tərəfindən Ambu kəndində Qarabağ müharibəsi əlili üçün fərdi yaşayış evi tikilmişdir.
Hesabat ilində şəhərin Heydər Əliyev meydanında ümummilli liderin abidəsi ucaldılmış, Heydər Əliyev mərkəzi üçün milli ornamentlərlə zəngin, müasir arxitektura üslubunda əzəmətli bina inşa edilmişdir.
Şəhərdə inşa edilmiş Azərbaycan Respublikasının Dövlət bayrağı meydanında tikinti işləri başa çatdırılmışdır. 35 metrlik qüllə üzərində Dövlət bayrağı ucaldılmış, “Uzunömürlülər muzeyi”nin yeni binası inşa edilmiş, rayon icra hakimiyyəti üçün tikilən üçmərtəbəli binada, habelə baytarlıq idarəsinin ikimərtəbəli inzibati binasında son tamamlanma işləri aparılır.
Tarix-diyarşünaslıq muzeyinin qarşısında böyük fəvvarə kompleksi, Cəngəmiran kəndində 35 yerlik uşaq bağçası tikilmiş, rayon prokurorluğunun binasında əsaslı təmir işləri aparılmış, rayon polis idarəsi üçün yardımçı binalar inşa edilmiş, Kələxan kəndində seysmoloji stansiya yaradılmışdır.
Şəhərdə 7 kommunal evin, rayon icra hakimiyyəti və rayon prokurorluğunun inzibati binalarının dam örtükləri dəyişdirilmişdir. Şəhərin küçə və meydanlarının işıqlandırma sistemləri bərpa edilmiş, küçələrdə istinad divarları milli ornamentlərə uyğun yenidən tikilmiş, şəhərin bütün əsas küçələrinə asfalt döşənmişdir. N.Nərimanovun abidəsi yenidən qurulmuş, buradakı bağ yenidən bərpa edilərək müasir üslubda oturacaqlar, işıqlandırma sistemi ilə təchiz edilmiş, əraziyə 150 kvadratmetr üzlük daş döşənmişdir.
Azərbaycan Respublikası Dövlət Neft Şirkətinin vəsaiti hesabına mərkəzi rayon xəstəxanasında əsaslı təmir işləri aparılmış, bu səhiyyə ocağı bərk və yumşaq mebellə təmin edilmişdir. Piran və Blaband kəndlərində dövlət vəsaiti hesabına tikilmiş həkim məntəqələri istifadəyə verilmişdir.
Hesabat dövründə rayon sakinləri tərəfindən Lənkəran-Lerik magistral yolu boyunca və digər yol kənarlarında 5048 ədəd müxtəlif növ ağac əkilmişdir.
Çıxış edənlər 2009-cu ildə görülən işlərdən söhbət açmış, mövcud problemlərin aradan qaldırılması ilə bağlı təkliflərini bildirmiş, cari ildə qarşıda duran vəzifələrdən danışmışlar.
Toplantıda Azərbaycan Respublikası Prezidenti Administrasiyasının məsul əməkdaşı Mikayıl Hüseynov və Milli Məclisin deputatı Miri Qənbərov iştirak etmişlər.
Yığıncaq iştirakçıları adından Prezident İlham Əliyevə müraciət qəbul olunmuşdur.