Liviya sahillərində 53 miqrant həlak olub
Bakı, 10 fevral, AZƏRTAC
Liviya sahillərində qayığın aşması nəticəsində 53 miqrant, o cümlədən iki körpə həlak olub və ya itkin düşmüş hesab edilir.
AZƏRTAC xəbər verir ki, bu barədə bazar ertəsi Beynəlxalq Miqrasiya Təşkilatı məlumat yayıb.
Bildirilib ki, qayıq ötən cümə günü Aralıq dənizinin mərkəzi hissəsində, sahilyanı Zuvara şəhərinin şimalında buzlu suda aşıb.
Bu hadisə həssas vəziyyətdə olan, tez-tez zorakılığa və insan alverinə məruz qalan köçkünlərlə bağlı insidentlər silsiləsində növbəti faciəvi epizoddur.
Qayıqda bir neçə Afrika ölkəsindən olan miqrantlar və qaçqınlar da olub. Qayıq cümə axşamı saat 23:00 radələrində Əz-Zaviyadan yola çıxıb. Təxminən altı saat sonra qayığa su dolmağa başlayıb və bundan sonra o aşıb.
İnsanların konkret olaraq hara getdikləri hələ məlum deyil. Lakin Liviyanı tərk edən miqrant və qaçqınları daşıyan qayıqların əksəriyyəti Əz-Zaviyadan təxminən 350 kilometr aralıda yerləşən İtaliyanın Lampedusa adasına istiqamətlənir. Beynəlxalq Miqrasiya Təşkilatının humanitar agentlikləri dəfələrlə xəbərdarlıq edib ki, insanların tez-tez istifadə etdiyi açıq doldurma qayıqlar belə bir səfər üçün qətiyyən uyğun deyil.
Beynəlxalq Miqrasiya Təşkilatının məlumatına görə, təkcə yanvar ayında Aralıq dənizinin mərkəzi hissəsində azı 375 nəfər həlak olub və ya itkin düşüb. Agentlikdən vurğulanıb ki, çoxsaylı digər faciələr, ehtimal ki, hakimiyyət orqanları və beynəlxalq təşkilatlar üçün naməlum qalır.
Bölmənin digər xəbərləri
