Türkiyəli nazir: 2023-cü il zəlzələləri zonasının bərpası hökumətin prioriteti olaraq qalır
Ankara, 9 fevral, AZƏRTAC
2023-cü ilin fevral ayında baş verən zəlzələlər zonasının bərpası Türkiyə hökuməti üçün prioritet olub və belə olaraq qalır. Fəlakətdən zərər çəkən 11 vilayətdə vəziyyət normallaşmadan, ölkənin aktiv inkişafı da mümkün deyil.
AZƏRTAC xəbər verir ki, bu barədə Türkiyənin ətraf mühit, şəhərsalma və iqlim dəyişikliyi naziri Murat Kurum Türkiyə Prezident Administrasiyasının Əlaqələndirmə ofisi tərəfindən Ankarada təşkil edilən tədbirdə bildirib.
Nazir xatırladıb ki, ölkənin zəlzələlərdən zərər çəkmiş ərazilərində tikinti və bərpa işlərinə 53 mindən çox vətəndaşın həyatına son qoyan təbii fəlakətdən cəmi 15 gün sonra başlanılıb.
“Episentri Kahramanmaraşda olan zəlzələlərin mənfi nəticələri 14 milyon Türkiyə vətəndaşına təsir edib, 100 mindən çox insan yaralanıb. Minlərlə yaşayış binası dağılıb və fəlakətdən dəyən iqtisadi ziyan 104 milyard dollara çatıb”, -deyə Kurum bildirib.
Onun sözlərinə görə, zəlzələ zonasındakı ilk mənzillərin açarları fəlakətdən 45 gün sonra sakinlərə təhvil verilib. “Bu gün biz artıq zərərçəkmiş vətəndaşlara təhvil verilən 455.000 mənzildən danışırıq. Hər gün fəlakət zonasının əyalətlərində 550 yaşayış məntəqəsi tikilirdi”, - deyə türkiyəli nazir vurğulayıb. O əlavə edib ki, bərpa işlərinin belə sürətli tempi dünyanın heç bir yerində qeydə alınmayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
