Fransada işəgötürənlərin 62 faizi namizədləri sosial şəbəkə hesablarına görə araşdırır
Paris, 10 fevral, AZƏRTAC
Fransada işə qəbul prosesi getdikcə çətinləşir. İşəgötürənlər namizədlərin tərcümeyi-halı ilə yanaşı sosial şəbəkələrdəki səhifələrini də araşdırır.
AZƏRTAC xəbər verir ki, Fransada əmək bazarı dəyişir. Proqnozlara görə, 2026-cı ildə şirkətlərin üçdə birindən çoxu yeni işçilər götürməyi, xüsusilə də daimi müqaviləli (CDI) iş yerləri yaratmağı planlaşdırır. Eyni zamanda, rəhbər və orta səviyyəli menecerlərin təxminən 40 faizi bu il iş yerini dəyişməyi düşünür. Bu canlanma əsasən iri şirkətlərdə müşahidə olunur. Belə bir şəraitdə yeni iş axtarmaq üçün münasib zaman kimi görünür. Lakin yeni nəslinin işə müraciət formalarında işəgötürənlər daha ehtiyatlı davranmağa başlayıblar.
Onlar indi sosial şəbəkə hesablarını yoxlayırlar. “Indeed” şirkətinin apardığı və “Le Parisien“ qəzetinin açıqladığı araşdırmaya görə, işəgötürənlərin 62 faizi namizədin sosial şəbəkə profilinə baxdıqdan sonra qərar verir. Qeyd olunub ki, hər kəsə açıq profillər işə qəbul prosesində real təsir gücünə malikdir.
Bu cür araşdırma 250–500 işçisi olan şirkətlərin təxminən dörddə üçündə tətbiq olunur. Sektorlar üzrə fərqlər də diqqət çəkir: hüquq sahəsində bu yoxlama doqquz haldan çoxunda avtomatik aparılır, istehsalat sənayesində bu göstərici 90 faizdən yuxarıdır. Maliyyə və memarlıq sahələrində isə 85 faizi ötür.
İşəgötürənlər bildirirlər ki, məqsəd namizədlərin maraq dairələrini öyrənməkdir. Bununla yanaşı, risk siqnalları və problemli davranışlar da diqqətlə izlənilir. Təhqiredici və ya ayrı-seçkilik yaradan paylaşımlar, qeyri-peşəkar məzmun, siyasi mübahisələr və xüsusilə CV ilə uyğun gəlməyən məlumatlar namizədin əleyhinə işləyə bilər.
Bölmənin digər xəbərləri
