Könül Quliyeva: Məqsədimiz "Safavy"ni insanların peşəkar inkişaf ekosisteminə çevirməkdir - MÜSAHİBƏ
Bakı, 9 fevral, Samirə Quliyeva, AZƏRTAC
Bildiyimiz kimi, KOBİA (Kiçik və Orta Biznesin İnkişafı Agentliyi) Azərbaycanda startapları dəstəkləmək və onlara rəsmi status vermək məqsədilə startap şəhadətnaməsi təqdim edir. Bu şəhadətnamə innovativ ideya və layihələrin hüquqi və maliyyə baxımından tanınmasını təmin edir. "Safavy" MMC KOBİA tərəfindən startap şəhadətnaməsi alıb və dövlət tərəfindən tanınmış startap statusuna malikdir.
"Safavy" MMC-nin həmtəsisçisi və İcraçı direktoru Könül Quliyeva platformanın yaranma ideyası, məqsəd və yenilikləri, kursların praktiki bacarıqlara yönəlməsi, interaktiv öyrənmə modelləri, AI əsaslı tövsiyə sistemi və mentorluq imkanları ilə onlayn təhsildə yaratdığı yeniliklər, həmçinin Azərbaycanda onlayn təhsil sahəsindəki çağırışlar barədə AZƏRTAC-ın suallarını cavablandırıb. O, həmçinin platformanın istifadəçilərə fərdiləşdirilmiş tövsiyələr və geniş inkişaf imkanları təqdim etdiyini və gələcəkdə regional bazarlara çıxmaq planlarını da açıqlayıb.
- Könül xanım, "Safavy” MMC-ni yaratmaq ideyası hansı şəxsi və ya peşəkar təcrübədən qaynaqlandı və bu sahədə hansı yeniliyi təqdim etməyi hədəfləmisiniz?
- "Safavy. org" ideyası mənim müəllim və təlimçi kimi fəaliyyətə başladığım dövrdə dostlarımın təklifi ilə yaranıb. Mən gördüm ki, çox dəyərli müəllimlər, təlimçilər və kurs mərkəzləri var, amma insanlar onları tapmaqda çətinlik çəkir. Digər tərəfdən də pandemiyanın başladığı, təhsilin çətinliklərlə üzləşdiyi bir dövrdə təhsil almaq istəyənlər çox vaxt düzgün, Azərbaycan dilində və etibarlı platforma tapa bilmirlər. "Safavy" ilə məqsədim bütün təhsil və inkişaf xidmətlərini bir platformada cəmləyən, istifadəçi üçün seçim, müqayisə və sifariş prosesini asanlaşdıran bir ekosistem yaratmaqdır. Bu, sadəcə kurs satışı platforması deyil, təhsil xidmətlərini sistemləşdirən bir marketplace modelinə çevrilmək istəyən platformadır.
- Platformada təqdim olunan kurslar istifadəçilərin real bacarıq inkişafına necə xidmət edir və kursların hazırlanmasında hansı prinsiplər rəhbər tutulur?
- Bizim üçün əsas prioritet nəzəri bilikdən çox, praktiki bacarıqların formalaşdırılmasıdır. "Safavy" platformasında kurslar seçilərkən onların əmək bazarında real tətbiq imkanlarına diqqət yetirilir.
Kursların hazırlanmasında üç əsas prinsip rəhbər tutulur:
• Praktik yönümlülük
• Müasir bazar tələblərinə uyğunluq
• Azərbaycan dilində aparıcı mövzuları əlçatan etmək
Məqsədimiz istifadəçinin kursu bitirdikdən sonra yalnız sertifikat yox, real bilik qazanmasıdır.
- Onlayn təhsil sürətlə dəyişir. "Safavy" bu sahədə hansı texnoloji yenilikləri, məsələn AI, interaktiv dərslər və oyun elementlərini tətbiq edir?
- Onlayn təhsil artıq sadəcə video izləməkdən ibarət deyil. "Safavy"də biz interaktiv öyrənmə modellərinə üstünlük veririk. Platformanın yeni modelində istifadəçilərin maraq və məqsədlərinə uyğun kursların tövsiyə olunması üçün AI əsaslı axtarış və uyğunlaşdırma sistemləri üzərində işləyirik. Eyni zamanda, interaktiv tapşırıqlar, mentorla canlı ünsiyyət və gələcəkdə həvəsləndirmə, çevik axtarış modellərinin tətbiqi planlaşdırılır. Məqsəd öyrənməni daha motivasiyaedici və effektiv etməkdir.
- Platformanın əsas istifadəçi profili kimlərdir və onların ehtiyaclarını qarşılamaq üçün hansı strategiyalarınız var?
- "Safavy"nin əsas istifadəçi auditoriyası karyerasını inkişaf etdirmək istəyən gənclər, peşəsini dəyişmək istəyən şəxslər və yeni bacarıqlar qazanmaq istəyən şəxslər və peşəkar mütəxəssislərdir. Biz onların ehtiyaclarını qarşılamaq üçün fərdiləşdirilmiş tövsiyələr, etibarlı təlimçi profilləri, istifadəçi rəyləri və müxtəlif qiymət seçimləri təqdim edirik. Eyni zamanda, istifadəçilərin öz inkişaf yolunu planlaşdıra bilməsi üçün mentorluq və istiqamətləndirmə xidmətləri də təqdim edirik.
- "Safavy"nin gələcək planları nələrdir? Yaxın illərdə beynəlxalq bazara çıxmaq və ya yeni sahələrdə kurslar təqdim etmək planınız varmı?
- "Safavy"ni regional platformadan qlobal marketplace modelinə çevirmək əsas hədəflərimizdəndir. Yaxın illərdə Orta Asiya, Yaxın Şərq və Afrika bazarlarına çıxmaq planlaşdırılır. Bununla yanaşı, yalnız kurslar deyil, mentorluq, təlim, internship və karyera inkişaf proqramlarının da platformaya inteqrasiyası planlaşdırılır. Məqsəd "Safavy"ni insanların peşəkar inkişaf ekosisteminə çevirməkdir.
- Azərbaycanda onlayn təhsil sahəsində əsas çağırışlar nələrdir və "Safavy" bu problemləri həll etmək üçün hansı təcrübə və modelləri istifadə edir?
- Azərbaycanda onlayn təhsilin əsas problemlərindən biri keyfiyyət və etibarlılıq məsələsidir. İstifadəçilər çox vaxt hansı kursun onlara uyğun olduğunu və nəticə verəcəyini müəyyən edə bilmirlər. "Safavy" bu problemi kursların strukturlaşdırılması, təlimçi profillərinin yoxlanılması, istifadəçi rəyləri və şəffaf təqdimat sistemi ilə həll etməyə çalışır. Digər vacib məsələ isə təhsil xidmətlərinin parçalanmış olmasıdır. "Safavy" bu xidmətləri vahid platformada birləşdirərək həm istifadəçilər, həm də təlimçilər üçün daha əlçatan və effektiv mühit yaradır.
Bölmənin digər xəbərləri
