AZƏRTAC-ın Müstəqil İslam İnformasiya Agentliyinə istinadla verdiyi xəbərə görə, mayın 4-də Londonda “Vətəndaşlıq, İslam və Qərb” mövzusunda konfrans keçiriləcəkdir. Tədbirin təşkilatçılarının yaydığı məlumatda deyilir ki, “11 sentyabr hadisələrindən, Əfqanıstanda və İraqda aparılan müharibələrdən, Madriddəki terror aktlarından sonra həm Qərbdə, həm də İslam aləmində bir çox insanlar “sivilizasiyaların toqquşmasının” getdikcə daha da labüd olacağını hesab edirlər.

Bununla əlaqədar konfransın əsas vəzifəsi Qərbdə yaşayan milyonlarla müsəlmanın Qərblə İslam aləmi arasında dialoqun yaranmasına necə yardım edə bilməsi məsələsinin müzakirəsindən ibarətdir. Onlar qarşılıqlı anlaşmanın yaranmasına və Qərb ölkələrində yaşayanlara İslamın əsl mahiyyətinin çatdırılmasına nail ola biləcəklərmi? Əks təqdirdə, onların uğursuzluğu vəziyyətin daha da gərginləşməsinə - iki “cəbhə” arasında ziddiyyətlərin daha da kəskinləşməsinə və qarşılıqlı hədələrin artmasına gətirib çıxara bilər.

Konfransda görkəmli İslam alimlərinin və Qərb mütəfəkkirlərinin iştirakı gözlənilir.