MAYIN 10-DA BAKIDA MÖHTƏŞƏM BAYRAM ŞƏNLİYİ KEÇİRİLƏCƏKDİR
Bakı Şəhər İcra Hakimiyyətindən AZƏRTAC-a bildirmişlər ki, ulu öndərimiz, dünya şöhrətli siyasi xadim Heydər Əliyevin 85 illik yubileyi ilə əlaqədar Bakı şəhərində möhtəşəm bayram mərasimləri keçiriləcəkdir.
Mayın 10-da İtaliya, Fransa və Hollandiyadan gətirilmiş gül-çiçəklə bəzədilmiş Heydər Əliyev Sarayının qarşısındakı parkda gül bayramı təşkil olunacaqdır. Səhər saat 8-dən başlayan gül bayramını seyr edənlər, həm də tanınmış incəsənət ustalarının canlı ifalarını dinləyəcək, dünyanın 150-dən çox ölkəsindən gətirilərək dibçəklərdə əkilmiş nadir güllərlə tanış ola biləcəklər.
Həmin gün axşam saat 21-dən 23-dək Milli Parkda - “Ağ fontan”ın qarşısında incəsənət ustalarının çıxışları dinlənildikdən sonra, eyni vaxtda Bakının 25-dən çox müxtəlif nöqtəsində 30 dəqiqəyədək möhtəşəm atəşfəşanlıq şəhərimizin bahar səmasını əlvan rənglərə boyayacaqdır. Almaniya, İtaliya və ABŞ-dan gətirilən və kompyuterlə idarə olunan avadanlığın yaydığı rəngarəng işıqlar 15 kilometr radiusda Bakı səmasını çıraqbana döndərəcəkdir.
Bakı Şəhər İcra Hakimiyyəti hamını bayram şənliyinə dəvət edir.
Bölmənin digər xəbərləri
