Mayın 11-dən Nur-Sultandan daha 4 şəhərə aviareyslər bərpa olunacaq
Nur-Sultan, 7 may, AZƏRTAC
Qazaxıstanda karantin rejiminin yüngülləşdirilməsindən sonra mayın 1-dən etibarən aviaşirkətlər ölkədaxili uçuşları bərpa etməyə başlayıb.
AZƏRTAC xəbər verir ki, “QAZAQ AIR” aviaşirkəti isə mayın 11-dən etibarən Nur-Sultandan Kostanaya, Aktyubinsk, Taldıkorqan və Pavlodara müntəzəm aviareysləri bərpa edəcək.
Ölkənin baş sanitar həkiminin qərarı ilə təyyarələrdə sərnişinlərin ara məsafə saxlaması şərtləri sadələşdirilib. Aviaşirkət reyslərdə sərnişin sıxlığı yaranmadığı təqdirdə ara məsafəsinin saxlanılması qaydalarını həyata keçirəcək.
Sanitar epidemioloji qaydalara görə, bütün sərnişinlər hava limanında təqdim edilməli olan COVID-19 testindən keçmək haqqında arayış almalıdırlar. Arayış 7 gün qüvvədədir.
Xatırladaq ki, mayın 1-dən Almatı ilə Nur-Sultan arasında aviareyslər bərpa edilib. Qazaxıstanda COVID-19-a yoluxmada artım qeydə alınmazsa fövqəladə vəziyyət mayın 11-də başa çatacaq.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
