MDU-da Bilik Günü: universitet ailəsinə 1688 tələbə qoşuldu
Bakı, 15 sentyabr, AZƏRTAC
Sentyabrın 15-də Mingəçevir Dövlət Universitetində (MDU) yeni tədris ilinin başlanmasına həsr olunmuş Bilik Günü tədbiri keçirilib. Universitetin həyətində təşkil edilən mərasimdə Mərkəzi Aran Gənclər və İdman İdarəsinin, şəhər Təhsil sektorunun və bələdiyyənin rəhbər şəxsləri, şəhid ailələrinin üzvləri, MDU-nun İctimai Nəzarət Şurasının nümayəndələri, akademik və inzibati heyət, tələbələr, magistrantlar, valideynlər və qonaqlar iştirak ediblər.
Əvvəlcə Ulu Öndər Heydər Əliyevin büstü önünə gül dəstələri qoyulub, onun əziz xatirəsi ehtiramla yad edilib. Daha sonra Dövlət Bayrağı ən yüksək balla qəbul olunmuş tələbələrin müşayiəti ilə meydana gətirilib. Ümummilli Lider Heydər Əliyevin və şəhidlərin xatirəsi bir dəqiqəlik sükutla yad olunub, Dövlət Himni isə orkestr və xor kollektivinin ifasında səsləndirilib.
Bu il ilk dəfə olaraq universitetin himni də tədbirdə səsləndirilib. Himn MDU-nun universitet statusu almasının 10 illik yubileyinə həsr olunub və tədbir iştirakçıları tərəfindən böyük coşqu ilə qarşılanıb.
Rektor Anar Eminov tədbiri açaraq Bilik Günü münasibətilə təbriklərini çatdırıb. O, Prezident İlham Əliyevin elm və təhsilə göstərdiyi diqqət və qayğını vurğulayıb, 2025-ci ilin ölkədə “Konstitusiya və Suverenlik İli” elan olunmasını xatırladıb. Rektor qeyd edib ki, bu il həm də xalqımızın böyük Qələbəsinin – Vətən müharibəsi Zəfərinin 5-ci ildönümüdür və bu tarixi hadisə gənclərin üzərinə əlavə məsuliyyət qoyur.
Universitetə qəbul göstəricilərindən danışan rektor bildirib ki, 2025/2026-cı tədris ilində MDU-ya ümumilikdə 1688 nəfər qəbul olunub: bakalavriat üzrə 1420, magistratura üzrə 166, əlavə təhsil üzrə isə 102 nəfər. Qəbul imtahanlarında yüksək nəticə göstərmiş 20 tələbəyə universitetin Elmi şurasının qərarı ilə birdəfəlik təqaüd ayrılıb.
Sonra Mingəçevir Şəhər İcra Hakimiyyətinin başçısı İlham İsmayılov və Milli Məclisin deputatı Aydın Mirzəzadə çıxış edərək gəncləri elmə, vətənpərvərliyə və biliklərə yiyələnməyə çağırıblar. Şəhid anası Azadə Abdullayeva isə gənclərin şəhidlərin yolunu şərəflə davam etdirəcəyinə inandığını vurğulayıb.
Tədbirdə ən yüksək balla – 638.8 bal toplayaraq universitetə qəbul olunmuş Şəbnəm Şirinova tələbə andını səsləndirib. Daha sonra 500-dən yuxarı bal toplamış tələbələr mükafatlandırılıb.
Mərasim valideynlərin çıxışları ilə davam edib. Tədbirin bədii hissəsində Şəki şəhər 4 nömrəli Uşaq Musiqi Məktəbinin müəllimi Fərqanə Qasımova “Çırpınırdı Qara dəniz” mahnısını ifa edib.
Tədbirdə Mərkəzi Aran Gənclər və İdman İdarəsinin, şəhər Təhsil sektorunun və bələdiyyənin rəhbər şəxsləri, şəhid ailələrinin üzvləri, MDU-nun İctimai Nəzarət Şurasının nümayəndələri iştirak ediblər.
Bölmənin digər xəbərləri
