® Azərbaycan yol mühəndisliyinin Avropadakı imzası – “Azvirt” VİDEO
Azərbaycanın tanınmış yol-tikinti şirkəti “Azvirt” MMC-nin Balkan regionunda fəaliyyəti genişlənir. Şirkət daha bir mühüm layihənin icrasını uğurla başa çatdırıb. “Azvirt”in Bosniya və Herseqovinadan olan konsorsium tərəfdaşı “Hering” şirkəti ilə birgə inşa etdiyi Avropanın mühüm Vc nəqliyyat dəhlizinin tərkib hissəsi olan Zenitsa Şimal–Qolubinya avtomobil yolunun 20 kilometrlik hissəsinin açılışı olub.
“Azvirt” yolun texniki baxımdan ən mürəkkəb hissələrindən biri hesab edilən 5,3 kilometrlik Vranduk–Ponirak sahəsinin tikintisində iştirak edib. Marşrutun uzunluğu nisbətən qısa olsa da, bu hissə iki körpü, bir tunel, üç böyük və hündür viadükü əhatə edir. Viadüklərdən ən hündürü 112 metrdir. Magistral yol əsasən dik yamaclarda və kəsiklərdə yerləşdiyindən layihə çərçivəsində çoxsaylı hündür istinad divarlarının inşası da nəzərdə tutulub.
Açılış mərasimində Bosniya və Herseqovina Federasiyasının Baş naziri Nermin Niksiç, Federasiyanın nəqliyyat və kommunikasiya naziri Andrijana Katiç, Federasiyanın “Avtomobil Yolları” İctimai Müəssisəsinin direktoru Denis Lasiç, Avropa İttifaqının Bosniya və Herseqovinadakı nümayəndəliyinin rəhbəri Luici Soreca, Azərbaycanın bu ölkədəki səfiri Vilayət Quliyev, “Azvirt” şirkətinin baş direktoru Kamil Əliyev və digər şəxslər iştirak ediblər.
Baş nazir Nermin Niksiç və digər rəsmi şəxslər çıxışlarında layihənin həyata keçirilməsində iştirak edən tərəfdaşlara və podratçılara təşəkkürlərini bildirərək, əldə olunan nəticələrin gələcəkdə də konkret uğurlarla müşayiət olunacağına ümidvarlıqlarını vurğulayıblar.
Qeyd edək ki, “Azvirt” şirkəti 2024-cü ilin sonunda da Bosniya və Herseqovinada mühüm layihələrdən birini tamamlayaraq təhvil verib. Şirkət Çindən olan konsorsium tərəfdaşları ilə birlikdə bölgənin mühüm mühəndislik qurğularından sayılan Poçitel körpüsünün tikintisini başa çatdırıb. Təxminən 100 metr hündürlüyündə viadüklər üzərində inşa edilən körpünün uzunluğu 945 metrdir. Bundan başqa, şirkət bu günədək Serbiya, Ukrayna və Qırğızıstanda bir sıra mühüm layihələri tamamlayıb, bəzilərinin inşasını isə hazırda uğurla davam etdirir.
“Azvirt” şirkətinin baş direktoru Kamil Əliyev əldə olunan nailiyyətlərdə Azərbaycan dövlətinin və Prezident İlham Əliyevin daim qayğı və dəstəyini hiss etdiklərini vurğulayıb.
“Fürsətdən istifadə edərək, bu dəstəyə görə ölkə rəhbərliyimizə təşəkkür edirik. Məhz bu dəstək sayəsində Azərbaycanın mühəndislik potensialını və mütəxəssislərimizin peşəkarlığını nümayiş etdirmək imkanı əldə etmişik. Buna görə də icra etdiyimiz hər bir layihədə keyfiyyətli iş görməyə, göstərilən etimadı doğrultmağa və üzərimizə düşən məsuliyyəti layiqincə yerinə yetirməyə çalışırıq”, - deyə K.Əliyev bildirib.
Onu da qeyd edək ki, “Azvirt” ölkə daxilində də mühüm infrastruktur layihələrinin həyata keçirilməsində iştirak edib. Son 5-6 il ərzində şirkət Qarabağda Füzuli, Zəngilan və Laçın beynəlxalq hava limanlarının uçuş-enmə zolaqlarının, perron və sükan yollarının tikintisini, “Horadiz–Cəbrayıl–Zəngilan–Ağbənd”, “Əhmədbəyli–Füzuli–Şuşa” avtomobil yollarının, eləcə də “Bakı–Quba–Rusiya Federasiyası ilə dövlət sərhədi” yeni avtomobil yolunun bir hissəsinin və “Füzuli–Hadrut” yolunun inşasını tamamlayıb.
Hazırda “Azvirt” çətin relyef şəraitində “Kəlbəcər–Laçın” avtomobil yolunun, Ələt Kargo Terminalının, Zəngəzur (TRIPP) dəmir yolu dəhlizinin tikintisində, həmçinin Bakı Metropoliteninin “28 May” stansiyasında “Yaşıl” və “Qırmızı” xətlərin ayrılması layihəsində fəaliyyətini davam etdirir. Bütün bunlar Azərbaycan şirkətlərinin beynəlxalq infrastruktur layihələrində iştirakının genişləndiyini, yerli mühəndislik potensialının və mütəxəssis təcrübəsinin xarici ölkələrdə də tətbiq olunduğunu göstərir. “Azvirt”in Balkan ölkələrində həyata keçirdiyi layihələr də Azərbaycanın yol-tikinti sahəsində qazandığı təcrübənin beynəlxalq miqyasda təqdim olunmasına xidmət edir.
Bölmənin digər xəbərləri
