MDU-da “Heydər Əliyev xatirələrdə” layihəsi çərçivəsində növbəti görüş keçirilib
Bakı, 14 noyabr, AZƏRTAC
Noyabrın 14-də Mingəçevir Dövlət Universitetinin (MDU) “Heydər Əliyev İli” çərçivəsində reallaşdırdığı “Heydər Əliyev xatirələrdə” adlı layihə ilə bağlı növbəti görüş keçirilib. Görüşün qonağı Elm və Təhsil Nazirliyi Riyaziyyat və Mexanika İnstitutunun baş direktoru, AMEA-nın müxbir üzvü, fizika-riyaziyyat elmləri doktoru, professor Misir Mərdanov olub.
MDU-dan AZƏRTAC-a bildirilib ki, görüşdə Mərkəzi Aran Regional Təhsil İdarəsinin, Yeni Azərbaycan Partiyası Mingəçevir şəhər təşkilatının nümayəndələri, ümumtəhsil məktəblərinin müəllim və şagird kollektivi, MDU-nun İctimai Nəzarət Şurasının üzvləri, professor-müəllim heyəti, tələbə və magistrantlar iştirak ediblər.
Əvvəlcə, Ümummilli Liderin MDU-nun inzibati binasındakı büstü ziyarət edilib və önünə gül dəstələri düzülüb.
Tədbir Ulu Öndərin və qəhrəman şəhidlərimizin əziz xatirəsinin bir dəqiqəlik sükutla yad edilməsi, Dövlət Himninin səsləndirilməsi ilə başlayıb.
Sonra MDU-nun rektoru Şahin Bayramov çıxış edərək, Ulu Öndərin zəngin irsinin təbliğinə töhfə vermək məqsədilə universitet tərəfindən reallaşdırılan sözügedən layihənin əhəmiyyətini diqqətə çatdırıb. Layihə çərçivəsində dahi şəxsiyyətin Azərbaycana rəhbərlik etdiyi dövrlərdə çalışmış ziyalılar və ictimai-siyasi xadimlərlə görüşlərin davam etdiyini bildirən rektor, Ümummilli Liderimizlə bağlı xatirələrə hər zaman böyük maraq göstərildiyini vurğulayıb. Rektor layihənin qonağının bioqrafiyası haqqında məlumat verib və dəvəti qəbul etdiyi üçün ona təşəkkür edib.
Görüş iştirakçılarını salamlayan professor Misir Mərdanov xalqımızın böyük oğlu, xilaskarı, müasir Azərbaycan dövlətinin memarı, əbədiyaşar lider Heydər Əliyevin anadan olmasının 100 illiyi münasibətilə universitetin ərsəyə gətirdiyi bu layihəni təqdirəlayiq hal kimi dəyərləndirib və əməyi olanlara minnətdarlığını bildirib. Vurğulayıb ki, Ulu Öndərlə eyni dövrdə yaşamaq, belə dahi bir şəxsiyyəti həyatda görmək, Ümummilli Liderin hökumət komandasının üzvü kimi onunla birbaşa ünsiyyətdə olmaq və bu böyük dövlət adamının tapşırıqlarını yerinə yetirmək olduqca xoş, şərəfli və məsuliyyətli qismət payıdır. Buna görə özünü xoşbəxt hesab etdiyini bildirən M.Mərdanov gənclik illərində, təhsil sektorunda müxtəlif vəzifələrdə çalışdığı dövrlərdə dahi şəxsiyyətlə bağlı xatirələrindən bəhs edib, Azərbaycanda elm və təhsilin inkişafında Ulu Öndərin müstəsna xidmətlərindən danışıb. Qeyd edib ki, müəllim adını hər zaman uca tutan, hərtərəfli dünyagörüşünə sahib, çox tələbkar, eyni zamanda, ədalətli və müdrik şəxsiyyət olan Heydər Əliyev xalqımıza misilsiz həyat və idarəçilik məktəbini miras qoyub. Hazırda Prezident İlham Əliyev tərəfindən Ulu Öndərin hərtərəfli inkişaf strategiyasının uğurla davam etdirildiyini diqqətə çatdıran professor qazanılan möhtəşəm və tarixi qalibiyyətlərlə Ümummilli Liderimizin vəsiyyətinin həyata keçdiyini və Heydər Əliyev ideyalarının təntənəsini yaşadığımızı bildirib. Heydər Əliyev irsinin öyrənilməsi və təbliğinin vacibliyini vurğulayan M.Mərdanov Ulu Öndərin hər zaman böyük ümidlər bəslədiyi, yüksək diqqət, qayğı və həssaslıqla yanaşdığı gənclərə bu istiqamətdə daha fəal olmağı tövsiyə edib və layihənin davamlı olmasını arzulayıb.
Sonra qonaq görüş iştirakçılarının suallarını cavablandırıb və müəllifi olduğu “Heydər Əliyev: xalqa həsr olunmuş ömür” kitabını qonaqlara, həmçinin MDU-nun kitabxana fonduna hədiyyə edib.
Bölmənin digər xəbərləri
