M.V.Lomonosov adına Moskva Dövlət Universitetinin

Bakı filialında “açıq qapı” günü

Bakı, 6 may (AZƏRTAC). M.V.Lomonosov adına Moskva Dövlət Universiteti Bakı filialının cəmi iki il əvvəl açıldığına inanmaq çətindir. Burada hər yer abad və səliqəlidir, gümrah və nikbin ab-hava hökm sürür. Ancaq mayın 5-də MDU-nun Bakı filialında keçirilən “açıq qapı” gününə gələnlər daha çox həyəcan hiss etmişlər. Bu da təbiidir. Çünki filialın qonaqları bu ali məktəbin tələbəsi olmaq istəyən abituriyentlər və onların narahat valideynləri idi.

MDU-nun professor və müəllimləri ilə görüşlər dörd auditoriyada keçirilmişdir. Axı, qocaman ali məktəbin Bakı filialında elə dörd fakültə - filologiya, tətbiqi riyaziyyat, kimya və psixologiya fakültələri fəaliyyət göstərir. Abituriyentlər öz valideynləri ilə otaqları gəzərək, seçdikləri peşənin əsl mütəxəssisi kimi yetişməkdə onlara kömək etməyə hazır olan insanlarla görüşmüşlər. Onlar filiala qəbul qaydaları, abituriyentlərə qarşı irəli sürülən tələblər, fakültələr üzrə məhdud ixtisasların seçimi şərtləri və bir çox digər məsələlərlə bağlı müxtəlif suallar vermişlər. Doğrudur, abituriyentlər bütün bunları ətraflı hazırlanmış “Abituriyentlərin nəzərinə” adlı soraq kitabından və bütün fənnlər üzrə qəbul imtahanlarının proqramından da öyrənə bilərlər.

Rektorluğun bəlkə də gələcəkdə bu universitetin tələbələri olacaq abituriyentlərlə görüşə ciddi hazırlaşdığı, onların hər birinin doğru seçim etməsinə böyük maraq göstərdiyi aşkar idi.

Bakıdakı 6 nömrəli orta məktəbin 11-ci sinif şagirdi Nəzrin Hüseynzadə demişdir: “Heç şübhəsiz, bu proqramlar və soraq kitabı bizə kömək edəcəkdir”. Nəzrin hesab edir ki, onun həyatı tətbiqi riyaziyyatla bağlı olmalıdır. Onun seçimini atası, mühəndis Məhəmməd Hüseynzadə də dəstəkləmişdir. Bəzi məsələlər qalır ki, onları da Moskvadan gəlmiş professorlar - fizika-riyaziyyat elmləri doktoru Anatoli Kombarov və MDU-nun kafedra müdiri Oqtay Qasımzadə ilə görüşüb aydınlaşdırmağa ümid bəsləyirlər.

Suraxanı məktəblisi Səbinə Məmmədli isə rus filologiyasını seçmişdir. Lakin qarşıda onu çətin imtahanlar gözləyir. Odur ki, Səbinə imtahanlara cidd-cəhdlə hazırlaşır.

Filologiyanı seçmiş abituriyentlərlə MDU-nun professoru, filologiya elmləri doktoru Sergey Knyazov söhbət etmişdir. O, gənc bakılıları inandırmışdır ki, MDU-nun filialında oxumaq son dərəcə maraqlı olacaqdır. Çünki Bakıya ən yaxşı müəllimlər göndərilir. Filialda artıq ikinci ildir ki, çalışan moskvalı professorlardan tələbələrin təhsil səviyyəsində irəliləyiş müşahidə olunduğunu eşitmək olduqca xoş idi. Deməli, əbəs yelə çalışmırlar, onların fəaliyyəti öz bəhrələrini verir. Bütün bunlar, həqiqətən adamı ruhlandırır.

S.Knyazov AZƏRTAC-ın müxbirinə demişdir: “Əminəm ki, bu kiçik uğurumuz mükəmməl, düzgün seçilmiş tədris prosesinə və MDU-nun Bakı filialının rəhbərliyinin, ilk növbədə onun rektoru, filologiya elmləri doktoru, professor Nərgiz xanım Paşayevanın bu işlərə böyük maraq göstərməsinə söykənir”.

Görünür, bu, Bakıya gəlmiş moskvalıların ümumi fikridir. Hər halda kimya elmləri doktoru, professor Vladimir Zlomanov da filialın cəmi iki il ərzində qazandığı uğurların səbəbini təxminən elə belə izah etmişdir. O demişdir: “Əlbəttə, düşünməyi və işləməyi tələb edən məsələlər hələ də vardır. Əsas odur ki, səni başa düşüb dəstəkləsinlər”. Vladimir Zlomanov daha bir vacib məqama toxunmuşdur. Moskva Universitetinin Bakı filialında mehriban mühit hökm sürür. Belə şəraiti yaradan isə rektorun özüdür. Tələbkar olduğu qədər də xeyirxah olan bir insanla işləmək həmişə yaxşıdır. Məhz buna görə də professor Zlomanov, məsələn, filialın tələbələrinin heç də hamısının kimya olimpiadasında iştiraka hazır olmadığına görə qanını qaraltmır. Çünki bütün bunların nə vaxtsa olacağına əsla şübhə etmir. Lakin çalışmaq lazımdır ki, gənc insan peşə seçimində səhvə yol verməsin. Elə “açıq qapı” günü də abituriyentlərə məhz bunları söyləmişdir.

Bakıdakı fəaliyyətləri barədə fikirlərini bölüşən moskvalı professorlar bildirmişlər ki, Bakı filialının öz üstünlükləri vardır. Burada digər filialların açılması zamanı yol verilmiş bütün qüsurlar və çatışmazlıqlar nəzərə alınmışdır.

Bu yerdə Nərgiz xanımın iki il əvvəl MDU-nun Bakı filialının təntənəli açılışında söylədiyi sözlər yada düşür. O vaxt N.Paşayeva demişdir ki, universitetin yaradılması elm və mədəniyyət naminə əməkdaşlığın rəmzi olan böyük başlanğıcdır.

Həqiqətən bu, belədir!.

######