Məktəb kollektivi xeyriyyə aksiyasında fəal iştirak edir
Bakı, 25 aprel, AZƏRTAC
Koronavirus COVID-19 pandemiyası ilə əlaqədar xüsusi karantin rejiminin tətbiq olunduğu dövrdə dövlət tərəfindən həyata keçirilən tədbirlərə dəstək olaraq ümumtəhsil müəssisələri də həvəslə qoşulub.
AZƏRTAC xəbər verir ki, Bakı şəhəri Q.Baxşıyev adına 179 nömrəli tam orta məktəbin kollektivi də sosial yardımlaşma təşəbbüsünə qoşularaq xeyriyyə aksiyası çərçivəsində aztəminatlı, tənha yaşayan ahıl şəxsləri, yataq xəstəsi olan bir qrup insanı evində ziyarət edib.
Belə ki, müəssisənin pedaqoji heyəti xüsusi karantin rejimi dövründə ehtiyacı olan 30-dan artıq ailəyə yardım çatdırıb. Həmçinin xüsusilə yaxın ətrafda yaşayan, ehtiyacı olan, məktəbdə təhsil alan şagirdlərin və çalışan işçilərin ailələri, övladını tək böyüdən və ya ailə üzvləri müxtəlif xəstəliklərdən əziyyət çəkənlər də ərzaqla təmin olunub.
Görüşlər zamanı insanlara Nazirlər Kabineti yanında Operativ Qərargahın tətbiq etdiyi karantin rejiminə uyğun olaraq, yaşı 65-dən yuxarı vətəndaşların evdənçıxma qadağasının əhəmiyyətindən söhbət açılıb. Ölkəmizdə infeksiyanın yayılmasının qarşısını almaq üçün görülən işlər, həyata keçirilən tədbirlər haqqında da məlumat verilib.
Bölmənin digər xəbərləri
