MƏDƏNİYYƏT
“Mələyin öpüşü” “YARAT”da nümayiş edilib
Bakı, 3 may, AZƏRTAC
“YARAT” Müasir İncəsənət Mərkəzində “Mələyin öpüşü” tammetrajlı bədii filmi nümayiş edilib.
AZƏRTAC xəbər verir ki, ekran əsəri atası ucbatından ərköyün, özündən razı böyüyən Elxan və həyat çətinlikləri ilə mübarizə aparan Cahan haqqındadır.
Cahan xəstə atasına baxmaq üçün, iş axtaran cavan bir qızdır. Axırıncı dayənin bezib getməsindən gileylənən ana Tamilla xanım öz oğluna xəstə baxıcısı axtardığına görə Cahana iş təklifi edir. Məşhur iş adamının oğlu - Elxanın bir il əvvəl avtomobil qəzası nəticəsində iflic olaraq, əlil arabasına məhkum olduğunu və danışma qabiliyyətini belə itirdiyini öyrənən Cahan tərəddüdsüz bir səkildə işi qəbul etsə də başına gələcəklərdən xəbərsizdir. Əvvəldə ikili arasında münasibətlər gərgin başlasa da, zaman keçdikcə bir-birilərinə qarşı duyğuları dəyişir...
Azərbaycan dilində izlənilən film maraqla qarşılanıb.