Memarlıq və İnşaat Universitetində istehsalat təcrübəsi ilə bağlı onlayn müzakirələr aparılıb
Bakı, 1 may, AZƏRTAC
Mayın 1-də Azərbaycan Memarlıq və İnşaat Universiteti (AzMİU) Təcrübə və karyera şöbəsinin müdiri Xanlar Qəniyev və şöbə əməkdaşları tərəfindən təcrübə rəhbərləri ilə onlayn görüş keçirilib.
AzMİU-dan AZƏRTAC-a bildirilib ki, 70-dən çox təcrübə rəhbərinin iştirak etdiyi görüşdə məlum vəziyyətlə əlaqədar karantin müddəti ərzində istehsalat təcrübəsinin necə başa çatması, tələbələrin təcrübi biliklərinin hansı formada qiymətləndirilməsi və s. kimi mövzular müzakirə olunub.
Görüşdə AzMİU-nun kafedra müdirləri Nurməmməd Məmmədov və Asəf Ağayev çıxış ediblər. Çıxışlarda istehsalat təcrübəsinə dair yaranmış suallar cavablandırılıb, təklif və tövsiyələr səsləndirilib, müzakirələr aparılıb. Bu müzakirələrə universitetin müəllim heyətindən Nəsibə Əmirbəyova, Nizami Əhmədov, İsmayıl Çobanzadə və başqaları qoşulub.
Sonda vaxt məhdudiyyətini nəzərə alaraq, çıxış edə bilməyən müəllimlərin onlayn şəkildə yazdığı çoxsaylı suallar şöbə əməkdaşları tərəfindən operativ şəkildə cavablandırılıb.
Bölmənin digər xəbərləri
