REGİONLAR
Məsuliyyətsizlik koronavirusa qarşı mübarizədə əldə olunan uğurları itirməklə nəticələnə bilər
Zaqatala, 2 may, Mustafa Dadaşov, AZƏRTAC
Bu gün dünya koronavirus pandemiyası səbəbindən özünün ən narahat və böhranlı günlərini yaşayır. İnsanların bu virusa yoluxmalarının qarşısını almaq məqsədilə ölkələr arasındakı sərhədlər bağlanıb, karantin rejimi tətbiq olunub, insanların özünütəcrid qaydaları tətbiq edilib. ABŞ-ın, bir sıra Avropa ölkələrinin səhiyyə sistemləri bu qəfil gələn bəlanın ağır fəsadlarına artıq tab gətirə bilmir.
Azərbaycan dövləti koronavirusa qarşı bütün qabaqlayıcı tədbirləri zamanında həyata keçirməklə yarana biləcək ciddi təhlükənin qarşısını almağa nail oldu. Prezident İlham Əliyevin bu sahədə gördüyü müdrik işlər xalqımızın sağlamlığının qorunmasının qarantına çevrildi. İndiki ağır və mürəkkəb şəraitdə dövlətimiz vətəndaşlarımızın sosial problemlərinin həlli üçün lazım olan bütün zəruri işləri görür. Koronavirus infeksiyasının yayılmasının qarşısının alınması ilə bağlı tətbiq olunan xüsusi karantin rejimi dövründə ölkəmizin hər yerində həssas qruplardan olan şəxslərlə bağlı mütəmadi olaraq sosial dəstək aksiyaları həyata keçirilir.
Bu fikirləri AZƏRTAC-ın bölgə müxbirinə müsahibəsində “Zaqatala” qəzetinin redaktoru, Əməkdar mədəniyyət işçisi İbrahim İbrahimov deyib.
Zaqatala ziyalısı bildirib ki, Prezident İlham Əliyevin koronavirus əleyhinə apardığı tədbirlər dövlətimizin başçısının həyata keçirdiyi sosial siyasətin mərkəzində Azərbaycan vətəndaşının dayandığını bir daha sübut edir. “Koronavirusla mübarizədə ölkəmizdə görülən işlər həm ölkə vətəndaşları, həm də beynəlxalq təşkilatlar tərəfindən yüksək qiymətləndirilir. Qürurverici haldır ki, Ümumdünya Səhiyyə Təşkilatı ölkəmizdə görülən işləri təqdir edərək, Azərbaycanın bu sahədə nümunəvi ölkə olduğunu açıq şəkildə söyləyir”.
Ölkəmizdə aprelin 27-dən başlayaraq bir sıra iqtisadi və sosial sahələr üzrə icazə və yumşalmaların tətbiq olunduğunu diqqətə çatdıran İbrahim İbrahimov deyib: “Çox təəssüf ki, vətəndaşlarımızın bir qismi yaradılan bu şəraiti düzgün qiymətləndirməyərək, karantin rejiminin qaydalarını pozmaqda davam edir. Öz müşahidələrimə əsasən deyə bilərəm ki, belə qayda pozuntularına hər yerdə rast gəlmək mümkündür. Vətəndaşlarımız elə zənn etməyə başlayıblar ki, sanki təhlükə sovuşub. Xüsusilə bankların, ticarət obyektlərinin qarşısında vətəndaşlar sosial izolyasiya məsafəsinə əməl etmir, qoruyucu maskalardan istifadəyə etinasız yanaşırlar. Belələri unudurlar ki, öz məsuliyyətsiz davranışları ilə təkcə özlərini deyil, ətrafdakı insanları da ciddi təhlükəyə atmış olurlar. Məsuliyyətsizlik koronavirusun geniş yayılması riskini artırır. Unutmaq olmaz ki, vətəndaşlarımızın məsuliyyətsizliyi ucbatından koronavirusa qarşı mübarizədə əldə olunan uğurları itirə bilərik. Bir daha hamını vətəndaş həssaslığını qorumağa, karantin rejiminin tələblərini tam şəkildə yerinə yetirməyə çağırıram”.