DÜNYA
Meymunlar planşet istifadəçiləri olacaqlar
Bakı, 19 avqust (AZƏRTAC). Vaşinqtonda yerləşən Smitsonov milli zooparkı dünyada Apps for Apes proqramına qoşulan 12 ölkədən biridir. Proqram iPad vasitəsilə qəfəsdə olan meymunların həyatına “rəng qatmaq” üçün nəzərdə tutulmuşdur.
Zoopark işçiləri həftədə iki dəfə oranqutanlar üçün planşet vasitəsilə zehni oyunlar oynamağa şərait yaradırlar. Meymunlar, həmçinin rəsm çəkmək və musiqi alətlərinin təqlidi proqramları ilə qarşılıqlı əlaqədə olur, hətta televiziya verilişlərinə baxırlar. İstehsalçıların sözlərinə görə, onlar meymunlar üçün nəzərdə tutulmuş proqramları hazırlayarkən uşaqların istifadə etdikləri proqramların hazırlanması metodlarından yararlanırlar.
Azərbaycan Milli Elmlər Akademiyasından AZƏRTAC-a bildirmişlər ki, “Computerworld” jurnalının məlumatına əsasən, zoopark nəsli kəsilməkdə olan meymunların müdafiəsi üzrə Orangutan Outreach adlı xeyriyyə proqramı ilə əməkdaşlıq edir. Nəzarətçilərin sözlərinə görə, iPad ziyarətçilərə insanların meymunlarla nə qədər oxşar olduqlarını aşılamaqla yanaşı, həm də onlarda meymunların xilası üçün yardım etmək əzmini gücləndirir.
Güman edilir ki, zaman keçdikcə müxtəlif qitələrdə yaşayan oranqutanlar bir-biri ilə FaceTime kimi videokonfrans proqramlarının köməyi ilə ünsiyyət qura biləcəklər. Daha bir ideya isə meymunların birbaşa qəfəslərdə istifadələri üçün möhkəmləndirilmiş iPad-lərın hazırlanmasıdır.