MİLLİ MƏCLİS VERGİ MƏCƏLLƏSİNƏ ƏLAVƏLƏR VƏDƏYİŞİKLİKLƏR ETMİŞDİR
AZƏRTAC xəbər verir ki, Milli Məclis Vergi Məcəlləsinə 80-dən çox əlavə və dəyişiklik etmişdir. Parlamentin iqtisadi siyasət daimi komissiyasının sədri Ziyad Səmədzadə demişdir ki, 2007-ci ilin dövlət büdcəsinə daxilolmaların 70 faizdən çoxu Vergilər Nazirliyi tərəfindən həyata keçiriləcəkdir. Məcəlləyə edilən dəyişikliklər vergi siyasətinin və vergi nəzarətinin təkmilləşdirilməsinə, vergi inzibatçılığında hesablamaların sadələşdirilməsinə xidmət edəcəkdir. Bir neçə əlavə və dəyişiklik isə redaktə xarakterlidir. Təklif olunan dəyişikliklər həm də vergidənyayınmanın qarşısını alacaq, hüquqi və fiziki şəxslərin vergi yükünü azladacaqdır. Əsas dəyişikliklərdən biri şərti maliyyə vahidi ilə bağlıdır. Belə ki, gələn ildən şərti maliyyə vahidindən imtina edilərək bütün cərimələr, hesablaşmalar və digər əməliyyatlar manatla həyata keçiriləcəkdir.
Komissiya sədrinin bildirdiyinə görə, hüquqi və fiziki şəxslərin vergidən yayınmasının qarşısını almaq və vergi daxilolmalarının həcmini artırmaq məqsədi ilə Azərbaycan Respublikasının Cinayət Məcəlləsinə və İnzibati Xətalar Məcəlləsinə də əlavələr və dəyişikliklər edilmişdir.
Bölmənin digər xəbərləri
