SİYASƏT
Milli Məclisdə Azərbaycan və Argentina arasında əlaqələrin genişləndirilməsi məsələləri müzakirə edilmişdir
Bakı, 30 oktyabr (AZƏRTAC). Oktyabrın 30-da III Bakı Beynəlxalq Humanitar Forumunda iştirak etmək üçün paytaxtımıza gəlmiş Argentina Milli Konqresinin Deputatlar Palatasının və Senatının təmsilçilərindən ibarət nümayəndə heyəti ilə Milli Məclisin Azərbaycan-Argentina parlamentlərarası işçi qrupunun üzvlərinin görüşü olmuşdur.
AZƏRTAC xəbər verir ki, uzaq Argentinadan Bakıya gəlmiş qonaqları Azərbaycan parlamentində görməkdən məmnunluğunu bildirən işçi qrupunun rəhbəri Rüstəm Xəlilov rəsmi Bakının Latın Amerikası ölkələri ilə əlaqələrin genişləndirilməsinə xüsusi önəm verdiyini və bu istiqamətdə lazımi tədbirlər həyata keçirdiyini bildirmişdir. Qeyd etmişdir ki, Argentina ilə Azərbaycan arasında müəyyən təmaslar olmuş və əməkdaşlıq əlaqələri yaradılmışdır. Bu əlaqələri daha da genişləndirmək və əhatəli etmək üçün qarşılıqlı səfərləri intensivləşdirmək lazımdır.
Bildirilmişdir ki, hər iki dövlət demokratik inkişaf yolu seçmişdir. Bu da siyasi əlaqələrlə yanaşı, xalqlarımızın da yaxınlaşmasına şərait yaradır. Bu il Azərbaycan Dillər Universitetində Argentina şöbəsi yaradılmışdır. Universitetdə təhsil alan tələbələr bu ölkənin xüsusiyyətlərini, Argentina xalqının mədəniyyətini və başqa cəhətlərini öyrənmək imkanı əldə etmişlər.
R.Xəlilov qonaqlara Azərbaycanın Dağlıq Qarabağ bölgəsinin Ermənistan tərəfindən işğal edilməsi haqqında məlumat vermiş və ölkəmizin ərazi bütövlüyünü dəstəklədiyinə görə Argentina dövlətinə təşəkkürünü bildirmişdir.
Səmimi görüşə görə minnətdarlığını bildirən Argentina parlamentinin nümayəndə heyətinin sədri Roberto Moulleran üçüncü dəfədir ki, Bakıda olduğunu və hər gəlişində Azərbaycan paytaxtının daha da gözəlləşdiyinin şahidi olduğunu nəzərə çatdırmışdır.
Qeyd olunmuşdur ki, Azərbaycan ilə Argentinanı birləşdirən əsas cəhət hər iki dövlətin demokratik inkişaf yolu seçməsindən ibarətdir. Dövlətlərimiz arasında əməkdaşlığın daha da genişləndirilməsi üçün böyük potensial vardır ki, bundan da səmərəli istifadə edib qarşılıqlı və səmərəli tərəfdaşlıq əlaqələri qurmaq olar. Bunun üçün siyasi xadimlərlə yanaşı, iş adamlarının və biznes strukturlarının nümayəndələrinin də qarşılıqlı səfərlərini təşkil etmək lazımdır. Argentina turistlər üçün cəlbedici ölkədir. Hər il milyonlarla turist bu ölkəyə gələrək mənalı istirahət edir. Azərbaycanın da böyük turizm potensialı vardır. Bu sahədə əməkdaşlıq həm iqtisadi baxımdan faydalı olar, həm də xalqlarımızın yaxınlaşmasını təmin edər.
R.Moulleran beynəlxalq təşkilatlar çərçivəsində Argentina ilə yaxından əməkdaşlıq etdiyinə görə Azərbaycan dövlətinə minnətdarlığını bildirmişdir.
Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.