Milli yüksəliş tariximizin unudulmaz günü
Babək, 11 iyul (AZƏRTAC, Rauf Əliyev). Naxçıvan Muxtar Respublikası Babək rayonunun Babək qəsəbəsində yerləşən mədəniyyət evində ulu öndər Heydər Əliyevin Azərbaycana rəhbərliyə başlamasının 45-ci ildönümünə həsr olunmuş tədbir keçirilmişdir.
AZƏRTAC xəbər verir ki, Babək Rayon İcra Hakimiyyətinin tədbirlər planına əsasən keçirilən mərasimdə rayonun təhsil, səhiyyə və mədəniyyət işçiləri iştirak etmişlər.
Tədbiri giriş sözü ilə açan Babək Rayon İcra Hakimiyyəti başçısının müavini Nailə Vəliyeva bildirmişdir ki, ümummilli lider Heydər Əliyevin 1969-cu il iyulun 14-də Azərbaycan rəhbərliyinə gəlişi keçmiş İttifaq dövləti daxilində geri qalmış respublikanın bir neçə il ərzində hərtərəfli inkişafı və o dövrə məxsus intibah əlamətləri ilə milli tariximizə unudulmaz bir gün olaraq yazılmışdır. 45 il əvvəl başlanan həmin yol Ulu Öndərin xalq işinə sədaqəti, milli maraqları hər şeydən üstün tutması ilə Azərbaycanı yaxınlaşmaqda olan dövlət müstəqilliyinə hazırlamışdır.
N. Vəliyeva qeyd etmişdir ki, görkəmli siyasi və dövlət xadimi Heydər Əliyev respublikaya rəhbərliyə başladığı ilk gündən qarşıya qoyduğu prioritet məsələ Azərbaycanın iqtisadiyyatını möhkəmləndirmək, onun şöhrətini, nüfuzunu yüksəklərə qaldırmaq, milli mənafeyini, milli mentalitetini, mədəniyyət və mənəviyyatını qorumaq və inkişaf etdirmək olmuşdur. Ulu Öndərin bir-birinin ardınca həyata keçirdiyi mühüm əhəmiyyətli tədbirlər nəticəsində Sovet hakimiyyəti dövründə respublikamız keçmiş SSRİ-də bütün sahələrdə öncül yerlərdən birinə çıxmışdır. Sosial-iqtisadi və mədəni sahələrdə aparılan islahatlar və uzaqgörən siyasət nəticəsində qazanılan nailiyyətlər ölkəmizin dövlət müstəqilliyi dövrü üçün mühüm sosial-iqtisadi və mədəni baza, təməl rolunu oynamışdır.
Vurğulanmışdır ki, 1969-1982-ci illər Azərbaycanın yeni tarixinə quruculuq illəri kimi daxil olmuşdur. Ölkə həyatında baş verən dəyişikliklərin miqyasına, iqtisadi və sosial sahələrdə aparılan köklü struktur islahatlarının xarakterinə, xalqın maddi rifah halının yüksəlməsinə görə respublikamız İttifaq miqyasında böyük şöhrət qazanmışdı. Bu dövrdə respublika iqtisadiyyatında böyük bir canlanma baş vermişdi. Yüzlərlə zavod və fabriklər inşa edilmiş, yeni istehsalat sahələri yaranmışdı. Neft və neft avadanlıqları, polad borular, əlvan metallar, sintetik kauçuk, elektrik mühərrikləri, tikinti materialları, məişət kondisionerləri, avtomobil hissələri, mineral gübrələr, çini-saxsı qablar, xalça və xalçaçılıq məmulatları istehsalı üzrə Azərbaycan keçmiş SSRİ-də ön sıraya çıxmışdı.
Babək Rayon Ağsaqqallar Şurasının sədri Vaqif Hüseynov bildirmişdir ki, Babək rayonu Ulu Öndərin birinci siyasi hakimiyyəti dövründə - 1978-ci il oktyabrın 23-də yaradılmışdır. Yeni rayona mərkəzi hakimiyyətin iradəsinin əksinə olaraq Babək adının verilməsi ümummilli lider Heydər Əliyevin qətiyyətinin, milli yaddaşın bərpası istiqamətində həyata keçirdiyi taleyüklü tədbirlərin nəticəsi idi. Yarandığı dövrdən ötən müddət ərzində rayon böyük inkişaf yolu keçmiş, ulu öndər Heydər Əliyevin quruculuq xəttinin yaradıcı gücünün konkret bir regionda əyani ifadəsinə çevrilmişdir. Ölkə və muxtar respublika rəhbərliyinin qayğısı və diqqəti sayəsində bu gün Babəkdə abadlıq-quruculuq işləri sürətlə davam etdirilir.
Daha sonra çıxış edən Babək qəsəbəsi tam orta məktəbinin direktoru Əli Hacıyev, rayon mərkəzi xəstəxanasının həkim-pediatrı Leylan Həsənova, Zeynəddin kənd uşaq musiqi məktəbinin direktoru Hüseyn Qafarov 14 iyulun Azərbaycanın siyasi, inkişaf tarixində oynadığı roldan ətraflı söhbət açmış, dahi şəxsiyyət Heydər Əliyevin təhsilin, səhiyyənin, mədəniyyətin və digər sahələrin inkişafında əvəzsiz xidmətlərindən danışmışlar.
Bölmənin digər xəbərləri
