MİNSK QRUPUNUN HƏMSƏDRLƏRİ MOSKVADA APARILMIŞ DANIŞIQLARDAN VƏ ÖZLƏRİNİN FƏALİYYƏTİNDƏN RAZIDIRLAR
AZƏRTAC-ın xüsusi müxbiri xəbər verir ki, Azərbaycan və Ermənistan XİN başçılarının Moskva danışıqlarında iştirak edən ATƏT-in Minsk qrupunun həmsədrləri məsləhətləşmələrdən razı qalmışlar.
ABŞ-dan olan həmsədr Mətyu Brayzə jurnalistlərə demişdir ki, E.Məmmədyarovun və E.Nalbandyanın bəyanatları və onların əhval-ruhiyyəsi göstərir ki, ATƏT-in Minsk qrupu normal fəaliyyət göstərir və “bizim bütün işlərimiz hər iki ölkənin nazirlərini qane edir”. Onun sözlərinə görə, danışıqlarda irəliləyiş olub-olmadığını demək çətindir, lakin tərəflərin bir-birinə konstruktiv münasibətinin özü “böyük uğurdur”.
Fransalı həmsədr Bernar Fasye bildirmişdir ki, Madrid təklifləri əsasında hər iki tərəfin və hər iki xalqın xeyrinə, bütün regionda sülhün xeyrinə kompromis variant tapmaq mümkündür. Rusiyalı həmsədr Yuri Merzlyakov isə demişdir ki, hər iki ölkənin rəhbərliyi bizim işimizi və fəallığımızı yüksək qiymətləndirir. Son üç ayda nazirlərin sayca üçüncü görüşü keçirilmiş, prezidentlər görüşmüş, həmsədrlər regiona səfər etmişlər.
Bölmənin digər xəbərləri
