Misir, İordaniya və İraq liderlərinin üçtərəfli sammiti keçirilib
Qahirə, 26 avqust, AZƏRTAC
Əmmanda Misir Prezidenti Əbdülfəttah əl-Sisi, İraqın Baş Naziri Mustafa Kazımi və İordaniya Kralı II Abdullanın iştirakı ilə üçtərəfli sammit keçirilib.
AZƏRTAC Misir Prezidentinin mətbuat xidmətinə istinadla xəbər verir ki, artıq üçüncü dəfədir keçirilən sammitdə 3 ölkə arasında iqtisadiyyat, ticarət və sərmayələr üzrə əməkdaşlığın vəziyyəti və perspektivləri, habelə regionda cərəyan edən proseslər ətrafında fikir mübadiləsi aparılıb. Əvvəlki sammitlərdə olduğu kimi, bu tədbirdə də Fələstin problemi diqqət mərkəzində olub. Liderlər Fələstin xalqının beynəlxalq sənədlər əsasında və paytaxtı Qüds olmaqla müstəqil dövlət qurmaq hüququnu bir daha vurğulayıblar.
Sammitdə Liviya və Yəməndə münaqişələrin nizamlanması məsələləri də müzakirə edilib. Qeyd olunub ki, Yaxın Şərqdə bütün problemlər dövlətlərin ərazi bütövlüyünün qorunması prinsipinə uyğun olaraq həllini tapmalıdır.
Misir Prezidenti, İordaniya Kralı və İraqın Baş Naziri üç ölkə arasında iqtisadi əməkdaşlığın inkişafı, yeni investisiya layihələrinin həyata keçirilməsi üzrə texniki məsələlərin həlli üçün birgə komissiyaların yaradılması barədə qərar qəbul ediblər.
Qeyd edək ki, liderlərin bundan əvvəlki sammitləri 2019-cu ildə Qahirədə və Nyu-Yorkda keçirilib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
