Misir mətbuatında Azərbaycanın nailiyyətlərindən bəhs edilib
Qahirə, 19 oktyabr, AZƏRTAC
Azərbaycanın Misirdəki səfiri Şahin Abdullayevin 18 oktyabr - Dövlət Müstəqilliyi Günü haqqında məqaləsi Misirin “Əl-Yaum Əs-Sabi” internet qəzetində və “Şəbab Əl-Nil” saytında yayılıb.
Məqalədə 1991-ci il oktyabrın 18-də Azərbaycan Respublikasının dövlət müstəqilliyi haqqında Konstitusiya Aktının qəbul edildiyini bildirən Ş.Abdullayev müsəlman Şərqində ilk respublika olan Azərbaycan Xalq Cümhuriyyətinin varisi kimi ölkəmizin müstəqilliyini bərpa etdiyini, beynəlxalq aləmə sürətlə inteqrasiya edərək qısa müddətdə BMT-yə və ATƏT-ə üzv qəbul edildiyini diqqətə çatdırıb. Eyni zamanda, ölkəmizin tarixən tərkib hissəsi olduğu və birgə irsi bölüşdüyü İslam dünyası ilə əlaqələrini bərpa etdiyini və əməkdaşlıq münasibətləri qurduğunu qeyd edib.
Azərbaycan Xalq Cümhuriyyətinin süqutuna şərait yaradan problemlərin müstəqilliyini yeni elan etmiş Azərbaycan Respublikasının da qarşısına çıxdığını qeyd edən səfir Ermənistanın ölkəmizə qarşı hərbi təcavüzü, torpaqlarımızın 20 faizini işğal etməsi barədə məlumat verib, yenicə əldə edilmiş müstəqilliyimizin xarici təzyiqlər və daxili çəkişmələr nəticəsində təhlükə altına düşdüyünü bildirib.
Diplomat belə çətin və kəşməkəşli vaxtda Azərbaycan xalqının təkidlə ulu öndər Heydər Əliyevi ölkə rəhbərliyinə dəvət etdiyini, məhz Ümummilli Liderin müdrikliyi və bacarığı sayəsində Azərbaycanın qısa müddətdə problemləri aradan qaldıraraq davamlı inkişaf mərhələsinə qədəm qoyduğunu bildirib. O, Ümummilli Liderin uzaqgörən siyasətinin və əvəzsiz xidmətlərinin nəticəsi olaraq mərkəzi hakimiyyətin gücləndiyini, xarici əlaqələrin genişləndiyini, Ermənistan ilə atəşkəs sazişinin imzalanmasına nail olunduğunu, ölkədə demokratikləşmə prosesinin başlandığını, “Əsrin müqaviləsi”nin imzalandığını, Azərbaycanın yeni neft strategiyasının əsasının qoyulduğunu oxucuların diqqətinə çatdırıb.
Azərbaycanın dünyanın ən sürətlə inkişaf edən ölkələrdən biri olduğunu qeyd edən səfir ölkəmizin neft və qaz boru kəmərləri vasitəsilə Şərq-Qərb enerji dəhlizində və Avropanın enerji təhlükəsizliyində aparıcı rolu, hökumətin gənclər siyasəti, elm və təhsilin inkişafı, “qara qızıl”ın insan kapitalına çevrilməsi istiqamətində həyata keçirdiyi ardıcıl tədbirlər barədə məlumat verib.
Ölkə rəhbərliyi tərəfindən qeyri-neft sektorunun inkişaf etdirilməsi istiqamətində görülən məqsədyönlü tədbirlərə toxunan Ş.Abdullayev 2003-cü illə müqayisədə 2012-ci ildə Azərbaycanda yoxsulluğun 49 faizdən 5 faizə düşdüyünü, son illər ərzində iqtisadiyyatın üç dəfə artdığını vurğulayıb, müstəqillik illərində ölkəyə böyük həcmdə investisiyaların cəlb edildiyini bildirib.
Məqalədə Azərbaycanda biznes mühitinin daha da yaxşılaşdırılması, ölkəmizin informasiya və kompyuter texnologiyalarının inkişafı sahəsində regional mərkəzə çevrilməsi barədə ətraflı məlumat verən səfir müstəqilliyinin ilk illərində xarici donorlardan və humanitar yardımlardan asılı olan Azərbaycanın bu gün beynəlxalq humanitar və sülhməramlı əməliyyatlara töhfə verən dövlətə çevrildiyini qeyd edib.
Səfir Azərbaycanın müstəqilliyinin əbədi və dönməz olduğunu vurğulayıb, ölkəmizi daha böyük perspektivlərin gözlədiyini oxucuların diqqətinə çatdırıb.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
