Misirdə koronavirusa yoluxanların sayı 7 min nəfəri keçib
Qahirə, 6 may, AZƏRTAC
Misirdə son sutka ərzində COVID-19 virusuna rekord sayda - 388 yoluxma halı qeydə alınıb.
AZƏRTAC xəbər verir ki, Misirin Səhiyyə Nazirliyinin məlumatında ölkədə koronavirusa yoluxanların ümumi sayının 7201 nəfərə çatdığı qeyd olunur.
Məlumatda mayın 5-də COVID-19 virusundan 16 nəfərin öldüyü, həyatını itirənlərin ümumi sayının 452 nəfərə çatdığı bildirilib. Misir Təbiblər Sindikatının məlumatına görə, indiyədək bu ölkədə koronavirusdan 12 həkim vəfat edib, 123 tibb bacısı virusa yoluxub. Əlavə edilib ki, son sutka ərzində xəstəlikdən 98 nəfər sağalıb, ümumilikdə 1730 pasiyent tam müalicə olunub.
Karantin rejiminin tətbiq edilməsindən sonra Misirdə koronavirusa yoluxma halları daha da artıb. Belə ki, son iki ay ərzində 6 min nəfərdən çox insan COVID-19 virusuna yoluxub. Ramazan ayında insanların marketlərə və bazarlara kütləvi axın etməsi də vəziyyəti ağırlaşdırıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
