Misirdə ulu öndər Heydər Əliyevin anadan olmasının 98-ci ildönümü qeyd edilib
Qahirə, 10 may, AZƏRTAC
Azərbaycan xalqının ümummilli lideri Heydər Əliyevin anadan olmasının 98-ci ildönümü ilə əlaqədar Qalyubiyyə vilayətinin Qanatır əl-Xeyriyyə şəhərində yerləşən Misir-Azərbaycan Dostluq parkında tədbir keçirilib.
AZƏRTAC xəbər verir ki, Ulu Öndərin heykəli önündə keçirilən tədbirdə Azərbaycanın Misirdəki səfirliyinin əməkdaşları, “Vətənpərvər” - Misirdəki Azərbaycan Diaspor Təşkilatları Birliyinin üzvləri, azərbaycanlı iş adamları, tələbələr, KİV-lərin nümayəndələri iştirak ediblər.
Tədbir iştirakçıları Ulu Öndərin əziz xatirəsini anıb, onun heykəli önünə gül dəstələri qoyublar.
Ölkəmizin Misirdəki səfiri Tural Rzayev çıxış edərək ümummilli lider Heydər Əliyevin Azərbaycan tarixində əvəzsiz rolundan bəhs edib. O vurğulayıb ki, məhz Ulu Öndərin gərgin və səmərəli fəaliyyəti nəticəsində ölkəmiz qısa müddətdə regionun aparıcı və ən güclü dövlətinə çevrilib, dünya birliyində layiqli yerini tutub. Səfir diqqətə çatdırıb ki, xalqımızın Ümummilli Lideri müasir Azərbaycan diplomatiyasının da banisidir.
Ulu Öndərin anadan olmasının 98-ci ildönümü ilə əlaqədar Misirin nüfuzlu və geniş oxucu kütləsinə malik Yaxın Şərq Xəbər Agentliyi, “Asiaelyoum” informasiya agentliyi, “Əl-Cumhuriyyə”, “Al-Masry Əl-Youm”, “Aldiplomacy”, “Əl-Vəsilə”, “Rayət Masr”, “Tahyra Masr” və s. KİV-ləri səfir Tural Rzayevin Heydər Əliyevə həsr etdiyi geniş məqaləsini yayımlayıblar.
Məqalədə ulu öndər Heydər Əliyevin xalqımız qarşısında misilsiz xidmətlərindən bəhs edilir, onun siyasi kursunun layiqli davamçısı Prezident İlham Əliyevin rəhbərliyi altında ölkəmizin iqtisadiyyatının inkişafı, qısa zaman ərzində donor ölkəyə çevrilməsi, Azərbaycanın haqlı mövqeyinin dünya birliyi tərəfindən tanınması və qüdrətli ordu yaranmasından söz açılır. Müəllif vurğulayır ki, ötən il 44 günlük müharibə zamanı Müzəffər Ali Baş Komandan İlham Əliyevin rəhbərliyi altında Azərbaycan Ordusu düşmən üzərində şanlı qələbə qazanıb, torpaqlarımızı işğaldan azad edib, ölkəmizin ərazi bütövlüyü təmin olunub. Diqqətə çatdırılır ki, ulu öndər Heydər Əliyevin vəsiyyətinin yerinə yetirilməsi məhz Prezident İlham Əliyev tərəfindən uğurla həyata keçirilən siyasi kursun nəticəsində mümkün olub.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
