“MOLLA NƏSRƏDDİN”İN YUBİLEYİNƏ HƏSR OLUNMUŞ TƏDBİR

25.04.2006 [20:19]
Çap et
A⁺ A^-

AZƏRTAC xəbər verir ki, “Molla Nəsrəddin” jurnalının 100 illik yubileyi çərçivəsində Təhsil Nazirliyinin, Dövlət Rəssamlıq Akademiyasının və Azərbaycan Karikaturaçılar Cəmiyyətinin birgə təşkilatçılığı ilə aprelin 25-də karikaturaçı rəssamların “Molla Nəsrəddin-100” mövzusunda əsərlərindən ibarət sərginin açılış mərasimi olmuşdur.

Azərbaycan Dövlət Rəssamlıq Akademiyasında keçirilən tədbirdə sənətsevərlərə karikaturaçılar cəmiyyətindən 32, akademiyadan 16 müəllim və tələbənin, ümumilikdə, 75 əsəri təqdim olunmuşdur.

Akademiyanın rektoru, Dövlət mükafatı laureatı, xalq rəssamı, akademik Ömər Eldarov tədbiri açaraq, əsərləri nümayiş olunan rəssamları təbrik etmişdir. Azərbaycanda karikatura janrının yaradılmasında və inkişafında, maarifçiliyin təbliğində, ictimai fikrin formalaşmasında “Molla Nəsrəddin”in tarixi xidmətlərindən danışan natiq böyük demokrat ədib Cəlil Məmmədquluzadənin çoxşaxəli yaradıcılığının əhəmiyyətindən danışmışdır.

Sənətşünaslar Leyla Axundzadə, Vəfa İbrahimqızı, heykəltəraş Fuad Salayev və başqaları jurnalın 100 illik yubileyi çərçivəsində keçirilən tədbirlərin əhəmiyyətindən bəhs etmişlər.

Tədbidə sərgi iştirakçılarının əsərlərindən ibarət kataloqun da təqdimat mərasimi keçirilmişdir.