Motosikletlər poçt markasında
Bakı, 27 avqust, AZƏRTAC
Rusiya poçtu avqustun 29-da motosikletin tarixinə həsr olunmuş 3 poçt markasını dövriyyəyə buraxacaq. Bu orijinal poçt markalarının üzərində “PMZ A-750”, “İJ-8” və “Ural-Saxara” adlı motosikletlər öz əksini tapacaq.
AZƏRTAC xəbər verir ki, poçt markalarının dövriyyəyə buraxıldığı gün Moskva və Sankt-Peterburq şəhərləri üçün “İlk gün” zərfi və möhür hazırlanacaq. Bundan əlavə markaların üzərinə xüsusi həkketmə həyata keçiriləcək. Layihə dizayner-rəssam İ.Ulyanovskiyə məxsusdur.
Hər 3 marka poçt vərəqində yer alaraq 30×42 millimetr ölçülərində hazırlanacaq və 104 min nüsxə ilə tədavülə buraxılacaq. Poçt vərəqi isə146×170 millimetr ölçülərində 13 min nüsxə ilə işıq üzü görəcək.
Qeyd edək ki, hər markanın nominal dəyəri 32 rubl təşkil edəcək.
Bölmənin digər xəbərləri
