Murovdağ döyüşçülərinin şərəfinə ucaldılmış xatirə abidəsinin açılışı olmuşdur VİDEO
Bakı, 4 iyul (AZƏRTAC). Müdafiə naziri, general-polkovnik Zakir Həsənovun təsdiq etdiyi tədbirlər planına əsasən Silahlı Qüvvələrdə keçirilən hərbi vətənpərvərlik həftəsi çərçivəsində Murovdağ şəhidlərinin xatirəsinə ucaldılmış abidənin açılışı olmuşdur.
Mərasimdə övladları Kəlbəcər və Murovdağ uğrunda döyüşlərdə həlak olmuş, qarlı və şaxtalı sərt aşırımlarında şəhidlik zirvəsinə ucalmış qəhrəman Vətən övladlarının valideynləri, müharibə veteranları, ictimaiyyət nümayəndələri və hərbçilər iştirak etmişlər.
Mərasimi Müdafiə Nazirliyinin mənəvi-psixoloji hazırlıq və ictimaiyyətlə əlaqələr idarəsinin rəis müavini, polkovnik Abdulla Qurbani açaraq qeyd etmişdir ki, ulu öndər Heydər Əliyev Azərbaycanın ərazi bütövlüyü və müstəqilliyi uğrunda canlarından keçmiş oğul və qızlarımızın xatirəsini həmişə əziz tutur, onların xatirələrinin əbədiləşdirilməsinə böyük önəm verirdi. Prezident İlham Əliyev də bu ənənəni uğurla davam etdirir və şəhid ailələri
dövlətimizin başçısının daim diqqət mərkəzindədir.
Müdafiə Nazirliyi rəhbərliyinin təşəbbüsü ilə şəhidlərin xatirə günlərinin geniş qeyd olunduğunu diqqətə çatdıran A.Qurbani demişdir ki, şəhidlər əsgəri ənənələrə uyğun olaraq hörmət və ehtiramla son mənzilə yola salınır, onların ailələrinin problemlərinin həlli üçün müvafiq tədbirlər həyata keçirilir. Müdafiə nazirinin əmri ilə Azərbaycan Əfqanıstan Veteranları İctimai Birliyi ilə birgə Silahlı Qüvvələrdə keçiriləcək tədbirlərin təşkili üzrə işçi qrupu yaradılmış, tədbirlər planı təsdiq olunmuşdur. Murovdağ şəhidlərinin xatirə abidəsinin ucaldılmasında Əfqanıstan müharibəsi veteranları da yaxından iştirak etmişlər.
Hərbi orkestrin ifa etdiyi Dövlət Himninin sədaları altında abidənin açılışını bildirən rəmzi lent kəsilmiş və xatirə lövhəsi vurulmuş qayanın üzərindən bəyaz örtük götürülmüşdür.
Azərbaycan Əfqanıstan Veteranları İctimai Birliyinin sədri Məhəmməd Vəliyev, birliyin fəallarından Əbülfət Hüseynov, Məhiyəddin Rüstəmov, Mirşamil Hadıyev, şəhidlərin ailə üzvləri, Qarabağ müharibəsində otuzdan çox doğmasını itirmiş kəlbəcərli Gülarə Hüseynova və başqaları çıxış edərək bu nəcib təşəbbüsə görə Müdafiə Nazirliyinin rəhbərliyinə və təşkilatçılara minnətdarlıqlarını bildirmişlər.
Şəhid anası demişdir ki, oğlu leytenant Elşən Böyükzadə 1994-cü ilin fevralında həlak olmuşdur. Onun cənazəsini Murov buzlarından qoparmaq mümkün olmamışdır. Bundan sonra Murovdağa gedən yolda ucaldılmış bu abidə onların üz tutacağı müqəddəs bir ziyarətgah olacaqdır.
Tədbirdə Silahlı Qüvvələrin mahnı və rəqs ansamblının iştirakı ilə Murovdağ döyüşçülərinə və şəhidlərinə ithaf olunmuş “Ana, Murovdan gəlirəm” adlı ədəbi-bədii kompozisiya təqdim edilmişdir.
Hərbi vətənpərvərlik həftəsi davam edir.
Bölmənin digər xəbərləri
