Naxçıvan Muxtar Respublikası Atletika Federasiyası fəaliyyətini genişləndirir
Naxçıvan, 2 fevral, AZƏRTAC
Naxçıvan Muxtar Respublikası Atletika Federasiyasının Naxçıvan şəhərində yerləşən Heydər Əliyev Uşaq-Gənclər Yaradıcılıq Mərkəzində bədii gimnastika bölməsi yaradılıb, hazırda isə Ordubad rayonunda, Naxçıvan Qızlar Liseyində, Naxçıvan Dövlət Texniki Kollecində növbəti gimnastika bölməsinin, Ordubad şəhər 1 nömrəli tam orta məktəbdə ağır atletika bölməsinin yaradılması istiqamətində iş davam etdirilir. Naxçıvan şəhərində və rayonlarda yerləşən ümumtəhsil məktəblərində 29 atletika, 2 ağır atletika idman klubu yaradılıb, klublara zəruri idman avadanlıqlarının verilməsi nəzərdə tutulub. Federasiyada yaradılmış atletika, bədii gimnastika və ağır atletika bölmələrində, ümumilikdə, 1340 atlet və gimnastla 54 məşqçi-müəllim məşğul olur.
AZƏRTAC-ın Naxçıvan bürosu xəbər verir ki, bu faktları Naxçıvan Dövlət Texniki Kollecində Naxçıvan Muxtar Respublikası Atletika Federasiyasının 2020-ci ilin yekunu və 2021-ci ildə görüləcək işlərə dair hesabat yığıncağında federasiyanın sədri Rəhman Məmmədov qeyd edib. O, muxtar respublikada idmanın inkişafına göstərilən diqqət və qayğıdan, Naxçıvan Muxtar Respublikası Ali Məclisi Sədrinin 2020-ci il 14 fevral tarixli Sərəncamı ilə təsdiq edilmiş “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın icrası istiqamətində görülmüş işlərdən, ötən müddət ərzində muxtar respublikanın şəhər və rayonlarındakı idman məktəbləri, mərkəzləri və ümumtəhsil məktəblərində yaradılan idman klublarından, ölkə və beynəlxalq səviyyəli yarışlarda yüksək nəticələrin əldə olunmasından ətraflı bəhs edib.
Vurğulayıb ki, muxtar respublikanın Atletika Federasiyası idmanın bu növünün inkişaf etdirilməsini, yeniyetmə və gənclərin idmana cəlb olunmasını, idman yarışlarının kütləviliyinin artırılmasını daim diqqətdə saxlamalı, gələcəkdə də Gənclər və İdman Nazirliyi ilə birgə işini günün tələbləri səviyyəsində qurmalıdır. Eyni zamanda, komandaların tərkibinin gücləndirilməsi istiqamətində bütün zəruri tədbirləri həyata keçirməlidir. Cari il üçün Federasiyanın Tədbirlər Planını iştirakçıların diqqətinə çatdıran Rəhman Məmmədov qeyd edib ki, ötən 6 ay ərzində atletika, ağır atletika və bədii gimnastika idman növlərinin təbliği və inkişafı məqsədilə bir sıra işlər görülüb.
Federasiya sədri idmanın inkişafı üçün göstərdiyi diqqət və qayğıya görə Naxçıvan Muxtar Respublikası Ali Məclisi Sədrinə minnətdarlığını bildirib.
Naxçıvan Muxtar Respublikası Gənclər və İdman naziri Azad Cabbarov qeyd edib ki, muxtar respublikada idman hər zaman diqqət mərkəzində saxlanılan və təşviq edilən bir sahə olub. Naxçıvan Muxtar Respublikası Ali Məclisi Sədrinin idman və idmançılara göstərdiyi diqqət və qayğı sayəsində idmana olan maraq gündən-günə artmaqdadır. Hazırda muxtar respublikada 35 min 105 idmançı 2 min 213 qrupda idmanla məşğul olur.
Diqqətə çatdırılıb ki, istifadəyə verilən müasir idman komplekslərinin sayına 2020-ci ildə daha bir idman kompleksi əlavə olunub, Uzunoba gölünün ətrafında Naxçıvan Muxtar Respublikası Futbol Federasiyasının Təlim-Məşq Kompleksi salınıb. “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın icrası ilə əlaqədar artıq bir çox işlər həyata keçirilib, Gənclər və İdman Nazirliyi Atletika Federasiyası ilə birgə idmanın bu növünü inkişaf etdirmək və kütləviliyinin təmin edilməsi məqsədi ilə bir sıra tədbirləri reallaşdırıb.
Atletika Federasiyasının sədr müavini İntiqam Rəhimov qərar layihəsini tədbir iştirakçılarının diqqətinə çatdırıb və yekdilliklə qəbul edilib.
Yekunda bir qrup idmançı və məşqçi-müəllim diplom və hədiyyələrlə mükafatlandırılıb.
Bölmənin digər xəbərləri
