Naxçıvan, 2 avqust (AZƏRTAC, Rauf Əliyev). Dördüncü çağırış Naxçıvan Muxtar Respublikası Ali Məclisinin doqquzuncu sessiyasında qarşıya qoyulan vəzifələr və cari ilin ilk 6 ayında görülən işlərlə əlaqədar Naxçıvan Muxtar Respublikası Səhiyyə Nazirliyində kollegiya iclası keçirilib.

AZƏRTAC xəbər verir ki, səhiyyə naziri Niyazi Novruzov iclas iştirakçılarını sessiyada qarşıya qoyulan vəzifələr barədə məlumatlandırıb. Nazirliyin 2014-cü ilin birinci yarısında öz işini təsdiq olunmuş iş və tədbirlər planına uyğun quraraq nöqsanların aradan qaldırılması üçün məqsədyönlü tədbirlər həyata keçirildiyi, əhalinin sağlamlığının etibarlı şəkildə qorunması istiqamətində fəaliyyətin davam etdirdiyi bildirilib.

Kollegiya iclasında nazirliyin tibbi statistika və informatika şöbəsinin müdiri Kəmalə Həsənova cari ilin ilk 6 ayında görülən işlərlə əlaqədar məruzə ilə çıxış edib. Qeyd olunub ki, Naxçıvan Muxtar Respublikası Ali Məclisi Sədrinin diqqət və qayğısı ilə hər il olduğu kimi, bu ilin ilk 6 ayı ərzində də muxtar respublikada səhiyyə binalarının tikintisi, onların maddi-texniki bazasının möhkəmləndirilməsi aparılan quruculuq işlərinin tərkib hissəsinə çevrilib.

Bildirilib ki, hazırda Naxçıvan Muxtar Respublikasında əhaliyə 237 səhiyyə müəssisəsi tərəfindən tibbi xidmət göstərilir. Həmin tibb müəssisələrində 734 həkim, 2 min 94 orta tibb işçisi çalışır ki, bu da muxtar respublika üzrə hər 10 min nəfərin 17 həkimlə, 48 orta tibb işçisi ilə təmin olunması deməkdir.

Ötən müddətdə muxtar respublika ərazisində epidemioloji vəziyyətin sabit olduğunu deyən məruzəçi vurğulayıb ki, bu dövrdə zoonoz və digər təhlükəli infeksiyalar qeydə alınmayıb. Ərazi gigiyena və epidemiologiya mərkəzləri tərəfindən ərzaq ticarəti obyektlərinə baxışlar keçirilərək aşkar edilən nöqsanların aradan qaldırılması üçün göstərişlər verilib, 3613 obliqat qrupu müayinədən keçirilib.

Şöbə müdirinin sözlərinə görə, tibb müəssisələrinin ambulatoriya bölmələri xidmətin əhatə dairəsini genişləndirib, pasiyentlərin USM, EKQ, EXO-kardioqrafiya, parametr üzrə laborator, EEQ, rentgenoloji, flüoroqrafik müayinələri ötən ilin müvafiq dövrünə nisbətən xeyli artıb. Kompyuter-tomoqraf aparatı vasitəsilə 1828, nüvə maqnit-rezonans aparatı ilə 498, mammoqrafiya aparatı ilə 412, qastroskopiya aparatı ilə 470, kolonoskopiya aparatı ilə 115 diaqnostika məqsədli müayinə aparılıb.

Qeyd olunub ki, bu il fevralın 17-dən mayın 1-dək bütün ölkə vətəndaşlarının kütləvi tibbi müayinədən keçirilməsi barədə Azərbaycan Prezidentinin müvafiq tapşırığı Naxçıvan Muxtar Respublikasında da uğurla icra olunub. Bu aksiyanın mütəşəkkil keçirilməsi üçün xüsusi tədbirlər planı hazırlanıb, dispanserləşdirmə tədbirlərinin səmərəliliyinə nail olmaq üçün kütləvi informasiya vasitələrində çıxışlar təşkil edilib, şəhər və rayon tibb müəssisələrində maarifləndirici seminarlar keçirilib. Bu dövr ərzində muxtar respublikada 273 min 555 vətəndaş tibbi müayinədən keçirilib, tibbi müayinə zamanı aşkar olunan ilkin, eləcə də qeydiyyatda olan xroniki xəstələr əlavə müayinələrə cəlb ediliblər.

Naxçıvan Muxtar Respublikasının yaradılmasının 90 illik yubileyi münasibətilə Azərbaycan Respublikası Səhiyyə Nazirliyi ilə birlikdə bir sıra tədbirlər həyata keçirilib, ayrı-ayrı ixtisaslar üzrə həkim briqadalarının Naxçıvanda fəaliyyətləri təşkil edilib. Sosial layihələr çərçivəsində cari ilin ilk 6 ayında yüksək ixtisaslı həkimlər tərəfindən, ümumilikdə, 156 cərrahi əməliyyat, o cümlədən 44 nəfər xəstədə açıq ürək, 1 xəstədə periferik damar, 6 xəstədə plastik, 39 xəstədə göz əməliyyatları aparılıb.

Əhalinin yaşayış səviyyəsinin yüksəldilməsi, öz növbəsində, demoqrafik vəziyyətə də müsbət təsir göstərib, muxtar respublika əhalisinin sayı 2014-cü il iyunun 1-nə olan məlumata görə, bir il əvvəlkinə nisbətdə 6 min 196 nəfər artaraq 437 min 67 nəfər olub.

Bildirilib ki, Naxçıvan Muxtar Respublikası əhalisinin dispanserləşdirilməsi işinin yaxşılaşdırılması məqsədilə Naxçıvan Muxtar Respublikası Səhiyyə Nazirliyinin, mərkəzi uşaq xəstəxanasının, doğum mərkəzinin, Naxçıvan Muxtar Respublika Xəstəxanasının, göz xəstəxanasının, kardioloji mərkəzin və rayon mərkəzi xəstəxanalarının yaratdığı həkim briqadaları mütəmadi olaraq ayda bir dəfə müxtəlif yaşayış məntəqələrində əhaliyə tibbi xidmət göstərərək onları müayinədən keçiriblər.