Naxçıvanda İmtahan Mərkəzi yaradılıb
Naxçıvan, 27 sentyabr, AZƏRTAC
“Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”na uyğun olaraq Naxçıvanda şagird nailiyyətlərinin mərkəzləşmiş qaydada monitorinqinin həyata keçirilməsi üçün Naxçıvan Muxtar Respublikası Təhsil Nazirliyi tərəfindən İmtahan Mərkəzi yaradılıb.
Naxçıvan Muxtar Respublikası Nazirlər Kabinetinin mətbuat xidmətindən AZƏRTAC-ın Naxçıvan bürosuna bildirilib ki, imtahan mərkəzinə tender yolu ilə ən müasir optik oxuyucular, çap avadanlıqları, kağız məmulatları və digər çap vəsaitləri alınaraq quraşdırılıb.
Məlumat üçün bildirək ki, mərkəzdən IV-VIII siniflərdə ümumi, IX-XI siniflərdə isə buraxılış formatında tədris ili ərzində 6 dəfə olmaqla, ödənişsiz sınaq imtahanlarının təşkili həyata keçiriləcək. Yeni yaradılan mərkəz şagirdlərin biliyinin qiymətləndirilməsi işinə öz töhfəsini verməklə yanaşı, tədrisin keyfiyyətinin artırılmasına şərait yaradacaq.
Bölmənin digər xəbərləri
