Naxçıvanda Zəfər Günü ərəfəsində rabitəçi şəhid ailələri ziyarət olunub
Bakı, 7 noyabr, AZƏRTAC
Ölkəmizin müstəqilliyi, suverenliyi və ərazi bütövlüyü uğrunda canını fəda etmiş şəhidlərimiz xalqımız tərəfindən hər zaman ehtiramla yad edilir, onların ailələrinə diqqət və qayğı göstərilir.
AZƏRTAC xəbər verir ki, 8 Noyabr - Zəfər Günü ərəfəsində Naxçıvan Muxtar Respublikası Rəqəmsal İnkişaf və Nəqliyyat Nazirliyinin əməkdaşları vətənimizin ərazi bütövlüyü uğrunda canından keçmiş rabitəçi şəhidlərin ailələrinə baş çəkiblər. Zəfər Günü münasibətilə şəhidlərin ailə üzvlərini təbrik ediblər.
Nazirlik əməkdaşları onlarla həmsöhbət olaraq mənəvi dəstəklərini bildiriblər və gətirdikləri sovqatları təqdim ediblər.
Görüşlər zamanı şəhidlərimizin müqəddəs amal uğrunda canlarından keçdiyini və onların qəhrəmanlıqlarının daim Azərbaycan xalqının yaddaşında yaşayacağı qeyd edilib. Mərd oğullarımızın qəhrəmanlıqla dolu döyüş yolu xatırlanıb, hər birinin göstərdiyi igidlikdən bəhs olunub.
Şəhidlərimizin ailə üzvləri onlara göstərilən diqqət və qayğıya görə ölkə rəhbərliyinə minnətdarlıqlarını bildiriblər.
Bölmənin digər xəbərləri
