Nazim Mahmudov Türk dövlətlərinin meteorologiya xidmətlərini daha sıx əməkdaşlığa dəvət edib
Bakı, 15 noyabr, AZƏRTAC
"Müşahidə şəbəkəsinin avtomatlaşdırılması və Dopler radar sistemlərindən istifadə hidrometeoroloji proqnozların və təhlükəli atmosfer hadisələri barədə xəbərdarlıqların keyfiyyətinin artmasında xüsusi rol oynayır. İyirmi ildən artıqdır ki, hidrometeoroloji proqnozların tərtibatında Türkiyə Respublikasının istehsalı olan "Turkmetkap" proqramından geniş istifadə olunur. Peyk məlumat mübadiləsi sistemi ilə hava proqnozlarının hazırlanmasında istifadə olunan faktiki məlumatlarla yanaşı, çoxsaylı proqnostik xəritələr, rəqəmsal modellərin nəticələri əldə olunur, informasiya mübadiləsi aparılır".
AZƏRTAC xəbər verir ki, bunu Ekologiya və Təbii Sərvətlər Nazirliyinin Milli Hidrometeorologiya Xidmətinin rəisi Nazim Mahmudov Türk dünyası II Meteorologiya Forumunda deyib.
N.Mahmudovun sözlərinə görə, hazırda iqlim dəyişmələrinin nəticələri kimi bölgədə təbii fəlakətlər, kəskin hava şəraitləri barədə mümkün qabaqlayıcı məlumatların bölüşülməsi, Türk dövlətlərini də əhatə edə biləcək Qərbi Asiya üçün SDS-WAS Regional Node sisteminin yaradılması və ümumən regional əməkdaşlığın inkişaf etdirilməsi böyük əhəmiyyət kəsb edir.
Xidmətin rəisi çıxışı zamanı məlumat mübadiləsi və iqlim dəyişmələri ilə mübarizə üzrə Türk dövlətləri arasında əməkdaşlığın inkişaf etdirilməsi istiqamətində təkliflər irəli sürərək deyib: "Meteoroloji məlumat, həmçinin bilik və təcrübə mübadiləsinin həyata keçirilməsi məqsədilə Türk dövlətlərinin meteorologiya xidmətlərinin birgə istifadəsi məqsədilə saytın yaradılmasını, dövlətlərimizin meteorologiya xidmətlərinin əməkdaşlığının hüquqi cəhətdən nizamlanması məqsədilə hidrometeorologiya sahəsində əməkdaşlığa dair Saziş layihəsinin hazırlanmasını, Paris Sazişinin 13-cü maddəsinin tələblərinə uyğun olaraq ölkələrimizdə Təkmilləşdirilmiş Şəffaflıq Formatına uyğun Monitorinq, Hesabatlılıq və Yoxlama (ÖHY- MRV) sisteminin qurulması üzrə təcrübə mübadiləsinin təşkil edilməsini, İstilik Effekti Yaradan Qazların (İEYQ) inventarlaşdırılması, mitiqasiya və adaptasiya tədbirlərinin modelləşdirilməsi üzrə birgə təlimlərin keçirilməsi, müsbət təcrübənin bölüşülməsi məqsədilə elmi-texniki məlumatların, müvafiq təhsil proqramlarının təkmilləşdirilməsi, habelə birgə konfrans və simpoziumların təşkil edilməsini, iqlim dəyişmələri üzrə mübarizəyə həsr edilmiş beynəlxalq platformalarda, o cümlədən UNFCCC və Ümumdünya Meteorologiya Təşkilatı forumlarında önəmli məsələlərin müzakirəsi zamanı razılaşdırılmış bir mövqedən çıxışların edilməsini təklif edirəm. Fürsətdən istifadə edərək bir daha Türk dövlətlərinin meteorologiya xidmətlərini daha sıx əməkdaşlığa dəvət edirəm".
Bölmənin digər xəbərləri
