Nazir: Bu vaxtadək İtaliyada 122 milyon vaksinasiya sertifikatı verilib
Roma, 11 noyabr, AZƏRTAC
Dekabrın 1-dən etibarən İtaliyada yaşı 40-60 arasında olanlara COVID-19 infeksiyası əleyhinə üçüncü doza peyvəndin tətbiqinə başlanılacaq.
AZƏRTAC xəbər verir ki, bu barədə İtaliyanın səhiyyə naziri Roberto Speranza deyib.
Nazir qeyd edib ki, üçüncü doza vaksin səhiyyə işçiləri üçün məcburi qaydada tətbiq olunacaq. Hazırda peyvəndin birinci dozasını qəbul edənlər ölkə əhalisinin 86,62 faizini, hər iki dozanı vurduranlar isə 83,77 faizini təşkil edir.
Xatırladaq ki, sentyabrın 20-dən İtaliyada tətbiqinə başlanılan üçüncü doza peyvənd əsasən yaşı 80-dən yuxarı və xroniki xəstəlikləri olanlara vurulur.
R.Speranza bildirib ki, indiyədək ölkədə 122 milyon “Yaşıl keçid kartı” (“Green pass” və ya vaksinasiya sertifikatı) verilib.
Qeyd edək ki, İtaliyada vaksinasiya sertifikatını həm dövlət, həm də özəl sektor üçün məcburi edən qanun oktyabrın 15-dən qüvvəyə minib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
