İyunun 22-də Nazirlər Kabinetində qaçqınların və məcburi köçkünlərin problemləri ilə məşğul olan dövlət qurumlarının, habelə bir sıra tikinti və layihə təşkilatları rəhbərlərinin iştirakı ilə müşavirə keçirilmiş, Azərbaycan Prezidentinin 2001-ci il 22 avqust, 7 sentyabr və 2002-ci il 13 may tarixli fərmanlarının icrası ilə əlaqədar görülən işlər müzakirə olunmuşdur. 

Baş nazirin müavini, Dövlətqaçqınkomun sədri Əli Həsənov çıxış edərək xatırlatdı ki, 2001-ci il 22 avqust tarixli Fərman 1988-1992-ci illərdə Ermənistandan qovulmuş və bu günədək məskunlaşmamış qaçqınları daimi məskunlaşdırmağı nəzərdə tutur. Ötən il sentyabrın 7-də verilən Fərman isə Füzuli və Ağdam rayonlarından olan, çadır şəhərciklərində və yük vaqonlarında yaşayan insanların bir qismini həmin rayonların işğal olunmamış ərazilərinə köçürməyi nəzərdə tutur. Biləsuvardakı çadır düşərgələrinin ləğv edilməsini nəzərdə tutan 2002-ci il 13 may tarixli Fərmana əsasən, Füzuli rayonundan 211 və Cəbrayıl rayonundan 2500 məcburi köçkün ailəsi yeni qəsəbələrə köçürüləcəkdir. Bununla da Biləsuvardakı beş çadır düşərgəsi ləğv ediləcəkdir.

Əli Həsənov bildirdi ki, çadır düşərgələrində müvəqqəti məskunlaşmış köçkünlər üçün yeni qəsəbələr tikilməsinə bir il vaxt ayrılmışdı. Lakin Prezident Heydər Əliyev 3719 mənzili və texniki-sosial infrastrukturu dekabr ayına qədər tikib başa çatdırmaq barədə tapşırıq vermişdir. Azərbaycan Prezidentinin fərmanlarının icrası ilə məşğul olan qurumlara - nazirliklərə, komitələrə, şirkətlərə, özəl təşkilatlara, layihə institutlarına, sifarişçilərə konkret tapşırıqlar verildi.

Müşavirədə iyul ayının 10-a qədər həm Biləsuvarda, həm də Füzulinin Haramı düzündə qərargah yaratmaq, 13 may tarixli Fərmanın icrasını ayda bir dəfə müzakirə etmək qərara alındı.

Ə.Həsənov bildirdi ki, tikintilərin maliyyələşdirilməsi sahəsində heç bir problem olmayaçaqdır. Sifarişçi və icraçı təşkilatçıların rəhbərlərinə müqavilələri vaxtında bağlamaq, lazımi sənədləri gecikmədən təqdim etmək barədə tapşırıqlar verildi. Obyektlərin təhvilvermə vaxtı müəyyən edildi.

Müşavirədə o da qeyd olundu ki, Goranboyun Aşağı Ağçakənd kəndində140 evin tikintisi başa çatdırılmış, əhaliyə torpaq sahələri və mal-qara paylanmışdır. İyul ayının axırınadək orada daha 224 evin tikintisi, habelə daxili yolların çəkilməsi, qəsəbələrin elektrik energisi ilə təmin olunması başa çatdırılacaqdır.

Müşavirədə həmçinin deyildi ki, son illər beynəlxalq humanitar təşkilatların respublikamıza yardımları azalmışdır. Əvvəllər bu təşkilatların ölkəmizə göstərdiyi yardım ildə 160-170 milyon dollar idisə, ötən il 40 milyon dollar olmuşdur. 1993-1994-cü illərdə Humanitar təşkilatların sayı da 160-dan 60-a enmişdir. Adətən, hər hansı ölkəyə 7 ildən çox humanitar yardım göstərilmir. Lakin bu təşkilatlar 9 ildir ki, ölkəmizə yardım edirlər. BMT-nin Ərzaq Proqramının ölkəmizdə fəaliyyətinin müddəti 3 il də uzadılmışdır. Bütün bunlar Azərbaycan Prezidenti Heydər Əliyevin beynəlxalq aləmdə yüksək nüfuzu sayəsində mümkün olmuşdur.

Müzakirə olunan məsələlər barədə geniş qərar qəbul olundu.