NAZİRLƏR KABİNETİNDƏ QƏBUL
İyulun 12-də Azərbaycanın baş naziri Artur Rasizadə Avstriya Respublikasının federal daxili işlər naziri Ernst Ştrasserin başçılıq etdiyi nümayəndə heyətini qəbul etmişdir. Baş nazir qonaqları salamlayaraq, Azərbaycanla Avstriya arasında münasibətlərin yaxşı səviyyədə olduğunu qeyd edərək, bu əlaqələri genişləndirməyin, Avstriyanın müxtəlif profilli şirkətlərinin ölkəmizin iqtisadi həyatında iştirakını gücləndirməyin zəruriliyini vurğuladı. Artur Rasizadə ölkəmizdə aparılan iqtisadi islahatlardan, ümumi daxili məhsulun artım göstəricilərinin ildən-ilə yüksəldiyindən danışaraq dedi ki, Ermənistan-Azərbaycan, Dağlıq Qarabağ münaqişəsinin nizama salınmaması, Ermənistan silahlı birləşmələrinin Azərbaycan torpaqlarının 20 faizini işğal etməsi respublikamız üçün başlıca problem olaraq qalır. Baş nazir Azərbaycanın və Avstriyanın daxili işlər nazirlikləri arasında əməkdaşlığın səviyyəsindən razılığını bildirdi. Ernst Ştrasser dedi ki, Avstriya Avropa ilə Asiyanın qovuşuğunda əlverişli coğrafi-strateji mövqedə yerləşən Azərbaycanla əməkdaşlığın inkişaf etdirilməsində maraqlıdır. Bu, narkotiklərin qanunsuz dövriyyəsi və mütəşəkkil cinayətkarlıqla mübarizədə fəaliyyətimizi əlaqələndirməyə imkan verər. Qəbulda Avstriyanın Azərbaycandakı fövqəladə və səlahiyyətli səfiri xanım Haydemariya Gürer iştirak edirdi.
Bölmənin digər xəbərləri
