“NEFT DAŞLARI”NDAKI YATAQXANALAR TƏMİR EDİLİR
Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, “Neft Daşları”ndakı yaraqxanalar təmir edilir.
“Neft Daşları”nda, dəmir dirəklər üzərində ucaldılmış şəhərcikdə 7 beşmərtəbəli və 1 doqquzmərtəbəli yataqxana fəaliyyət göstərir. “Neftqaztikinti” tresti üç yataqxananın təmirini başa çatdırmışdır. Bu il isə daha 2 yataqxananın təmiri nəzərdə tutulmuşdur. Açıq dənizdə ən hündür tikili olan 9 mərtəbəli qadın yataqxanasında təmir işlərinə ötən ilin avqustunda başlanmışdır. Təmir layihəsini “Dənizneftqazlayihə” İnstitutu hazırlamışdır. Yataqxanada ikinəfərlik 168 otaq mövcuddur. Yaxın günlərdə təmir olunmuş 80 otaq neftçilərin istifadəsinə veriləcəkdir.
Təmir işləri Avropa standartlarına uyğun, ən yeni üzlük materiallardan, santexnika və elektrik avadanlığından istifadə edilməklə aparılır. Binanın döşəmələri laminatla örtülmüş, qapı və pəncərələri dəyişdirilmişdir. Hər bir mənzil vanna və duş otağı, telefon, yeni soyuducu, televizor, kondisioner, habelə rahat və gözəl mebellə təchiz olunmuşdur. Bu ilin sonunadək binanın qalan hissəsi də təmir edilərək təhvil veriləcəkdir.
Eyni zamanda, kişilər üçün nəzərdə tutulmuş 412 yerlik beşmərtəbəli yataqxananın da Avropa standartlarına uyğun təmiri başa çatdırılacaqdır. Yaxın illərdə “Neft Daşları”nda daha iki beşmərtəbəli yataqxananın və 1 binanın təmiri nəzərdə tutulmuşdur.
Bölmənin digər xəbərləri
