NEFT FONDUNUN İCRAÇI DİREKTORU MHŞT ÜZRƏ İDARƏ HEYƏTİNİN İCLASINDA İŞTİRAK ETMİŞDİR
AZƏRTAC xəbər verir ki, mayın 26-27-də İspaniyanın Madrid şəhərində Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə İdarə Heyətinin növbəti iclası keçirilmişdir.
Azərbaycanı İdarə Heyətində təmsil edən MHŞT üzrə hökumət komissiyasının sədri, Azərbaycan Respublikası Dövlət Neft Fondunun icraçı direktoru Şahmar Mövsümov iclasda iştirak etmişdir.
Toplantıda MHŞT-nin tətbiqinə dair məsələlər hərtərəfli müzakirə edilmiş və 23 ölkənin, o cümlədən Azərbaycanın namizəd statusu əldə etdiyi qeyd edilmişdir. İdarə Heyətinin qərarına əsasən MHŞT-nin tam üzvü olmaq üçün ölkələrdə xüsusi qiymətləndirmə prosesi keçirilməlidir.
İdarə Heyətinin iclasında Azərbaycanın qiymətləndirmə prosesinə başlamış ilk ölkə olması xüsusi vurğulanmış və təqdir edilmişdir. Azərbaycan hökuməti tərəfindən BMT-nin Baş Assambleyasına təqdim edilən Şəffaflıq Təşəbbüsünü dəstəkləyən qətnamə layihəsi barədə də məlumat verilmiş və bu məsələ ilə bağlı geniş müzakirə aparılmışdır.
Bölmənin digər xəbərləri
