Neft-qaz sektoruna yönəldilən investisiyalar 6,2 faiz azalıb
Bakı, 16 aprel, AZƏRTAC
Yanvar-mart aylarında neft-qaz sektoruna 1 milyard 355,7 milyon manat yönəldilib. Əvvəlki ilin eyni ayları ilə müqayisədə neft-qaz sektoruna yatırılmış investisiyalar 6,2 faiz azalıb.
Dövlət Statistika Komitəsindən AZƏRTAC-a bildirilib ki, üç ayda neft-qaz sektorunda 6 milyard 859,5 milyon manatlıq məhsul istehsal olunub. Sənayenin bu sektorunda məhsul istehsalı əvvəlki ilin eyni aylarına nisbətən 5,9 faiz azalıb. Neft-qaz sektorunda istehsal olunmuş əlavə dəyər isə 7,3 faiz geriləyib.
Sənaye məhsulunun 63,7 faizi mədənçıxarma sektorunda istehsal edilib. Martda sənaye məhsullarının istehsalçı qiymətləri indeksi əvvəlki ayla müqayisədə 104,5 faiz, o cümlədən mədənçıxarma sənayesi üzrə 105,3 faiz təşkil edib. Əvvəlki aya nisbətən istehsalçı qiymətləri indeksi martda neft-qaz sənayesi üzrə isə 105,1 faiz olub.
Martın 1-nə iqtisadiyyatın neft-qaz sektorunda 33,2 min nəfər çalışıb. Yanvar-fevral aylarında neft-qaz sektorunda nominal əməkhaqqı isə 3182 manat təşkil edib.
Bölmənin digər xəbərləri
