Nəriman Abdullayev: Aşağı çəki dərəcələrində güclü boksçular yetişir
Bakı, 16 fevral, AZƏRTAC
Gənc boksçular arasında Azərbaycan birinciliyinə bu gün yekun vurulacaq. Turnirin yüksək səviyyədə təşkili üçün hər cür şərait yaradılıb. Yarış maraqlı idman mübarizəsi şəraitində keçir. Fikrimcə, aşağı çəki dərəcələrində daha güclü boksçular yetişirlər.
Bu sözləri boks üzrə Azərbaycan yığmasının böyük məşqçisi Nəriman Abdullayev AZƏRTAC-a müsahibəsində deyib.
Baş məşqçi bildirib ki, pandemiya ilə əlaqədar boks yarışları uzun müddətdir keçirilməyib. Bu baxımdan gənclər arasında belə bir yarışın keçirilməsi çox vacibdir. Boksçuların uzun müddət yarışlardan kənarda qalması, şübhəsiz yaxşı hal deyil. Amma qarşılaşmalarda yarış iştirakçılarının nümayiş etdirdikləri taktiki, texniki və fiziki hazırlıq qənaətbəxşdir. Bu, göstərir ki, idmançılarımız məşqləri vaxtlı-vaxtında edirlər”.
Məşqçi yeniyetmə boksçuların da güclü potensial nümayiş etdirdiklərini bildirib. N.Abdullayev gənclər kateqoriyasına yeni keçid edən boksçuların ümidləri doğrultduqlarını və medalçılar sırasında yer aldıqlarını deyib.
Bölmənin digər xəbərləri
