Niderland polisi MH17 işi üzrə şübhəli bilinənlərin həbsinə order verib
Bakı, 19 iyun, AZƏRTAC
Birgə İstintaq Qrupu 2014-cü ildə MH17 reysini həyata keçirən “Boeing” təyyarəsinin Ukrayna ərazisində vurulmasında şübhəli bilinən şəxslərin həbsinə beynəlxalq order verib.
AZƏRTAC TASS informasiya agentliyinə istinadla xəbər verir ki, bu barədə Niderland polisinin rəhbəri Vilbert Paulissen mətbuat konfransında deyib.
Müstəntiqlər şübhəlilər arasında Strelkov ləqəbli rusiyalı İqor Qirkinin, həmçinin Sergey Dubinskinin, Oleq Pulatovun və Ukrayna vətəndaşı Leonid Xarçenkonun adlarını çəkiblər.
Xatırladaq ki, Amsterdamdan Kuala-Lumpur şəhərinə MH17 reysini həyata keçirən “Malaysia Airlines” aviakompaniyasına məxsus “Boeing-777” təyyarəsi 2014-cü il iyulun 17-də Ukraynanın Donetsk vilayəti üzərində vurulmuşdu. İnsident nəticəsində 10 ölkənin vətəndaşları olan 283 nəfər və 15 ekipaj üzvü həyatını itirmişdi. Yerdə aktiv döyüş əməliyyatlarına baxmayaraq, Kiyev Donbas səmasını beynəlxalq sərnişin aviareysləri üçün bağlamamışdı.
Qəza ilə əlaqədar yaradılan Beynəlxalq İstintaq Qrupuna Avstraliya, Belçika, Malayziya, Niderland və Ukrayna nümayəndələri daxildir. MH17 işi üzrə məhkəmə prosesinin 2020-ci ilin martında Haaqada başlayacağı bildirilir.
Bölmənin digər xəbərləri
