NORVEÇİN XARİCİ İŞLƏR NAZİRİ AZƏRBAYCAN DİLLƏR UNİVERSİTETİNDƏ OLMUŞDUR
AZƏRTAC xəbər verir ki, ölkəmizdə səfərdə olan Norveçin xarici işlər naziri Yonas Qar Störe aprelin 29-da Azərbaycan Dillər Universitetinin müəllim və tələbələri ilə görüşmüşdür.
Universitetin rektoru Səməd Seyidov ölkələrimiz arasında ikitərəfli əlaqələrdən danışaraq, rəhbərlik etdiyi təhsil ocağında skandinaviyaşünaslıq fakültəsinin fəaliyyət göstərdiyini, burada Norveçdən gələn müəllimlərin iştirakı ilə dil, ədəbiyyat və tarix fənlərinin tədris olunduğunu diqqətə çatdırmışdır.
Xarici işlər nazirinin müavini, Azərbaycan Diplomatik Akademiyasının rektoru Hafiz Paşayev Azərbaycan ilə Norveç arasındakı əməkdaşlığın perspektivlərindən, bu münasibətlərin gələcəkdə yüksələn xətlə inkişaf etdirilməsinin vacibliyindən söz açmışlar.
Müəllim və tələbələr qarşısında “Norveç və Azərbaycan-Avropa əməkdaşlığı” mövzusunda məruzə ilə çıxış edən Yonas Qar Störe ölkəsinin Azərbaycan ilə iqtisadi sahədə əməkdaşlığa böyük önəm verdiyini bildirmişdir. Son illər Azərbaycan ilə diplomatik əlaqələrin daha da genişləndiyini vurğulayan qonaq, Norveçin Dağlıq Qarabağ münaqişəsinin həllində Azərbaycanın mövqeyini dəstəklədiyini diqqətə çatdırmışdır.
Bölmənin digər xəbərləri
