Nurlan Aslanov: Kunq-fu bir neçə idman növünün elementlərini özündə birləşdirir
Bakı, 14 sentyabr, AZƏRTAC
Azərbaycan Çin Döyüş Növləri Assosiasiyasının tərkibinə üç idman növü - kunq-fu, vinq-çun və uşu daxildir. Artıq assosiasiyanın İdarə Heyəti də formalaşıb. Hər üç federasiyadan İdarə Heyətinə üzv seçilib. Qarşıya qoyulan məsələlərin həll olunması barədə qərar səsvermə ilə müəyyən edilir. Assosiasiyanın yaranmasının əsas məqsədi də ölkəmizdə Çin idman növlərini bir qurum altında birləşdirməkdir.
Bunu AZƏRTAC-a məxsusi müsahibəsində Azərbaycan Kunq-fu Federasiyasının prezidenti Nurlan Aslanov deyib.
O bildirib ki, hər üç idman növündən ibarət yığma komanda formalaşdırılacaq: “Təbii ki, assosiasiyanın sıralarının genişlənməsi qaçılmazdır. Artıq müraciətlər də kifayət qədərdir. Bu müraciətləri assosiasiyanın İdarə Heyəti ilə birgə müzakirə edəcəyik. Əgər müraciət olunan həqiqətən də Çin döyüş növüdürsə, səsverməyə çıxarılacaq, rəy əsasında Gənclər və İdman Nazirliyinə müraciət ünvanlanacaq”.
“İyulda Azərbaycan kəməri uğrunda yarışlar təşkil olundu. Bu, respublika çempionatını əvəz edirdi, çünki həmin vaxt Gənclər və İdman Nazirliyinin akkreditasiyasından keçməmişdik. Bu yolla idmançıların yarış təcrübəsini formada saxlayacaqlarını düşündük. Həmçinin ən yaxşı idmançıları müəyyən etdik. Təbii ki, bundan sonra respublika çempionatı keçirəcəyik. Burada da güclü idmançılar seçiləcək və milli komandalara cəlb olunacaqlar. Əlbəttə ki, bununla da kifayətlənməyəcəyik. Həmin idmançılar təlim-məşq bazasına dəvət olunacaqlar. Baş məşqçi Ramin Allahverdiyevin rəhbərliyi altında hazırlıq prosesi təşkil olunacaq. Həmin təlim-məşq toplanışında idmançıların fiziki hazırlığı, davamiyyəti və yarışa hazırlıq dərəcəsi müəyyən ediləcək. Əgər iki idmançı arasında şübhəli məqamlar olarsa, məşq bazamızda hakimlər təyin olunur, özümüzün də iştirakı ilə yenidən döyüş keçirilir. Sonda xallar hesablanır, ən güclü kimdirsə, beynəlxalq yarışlara o dəvət alır”, - deyə federasiya prezidenti əlavə edib.
Nurlan Aslanov qeyd edib ki, respublika çempionatından sonra dərhal yığma komandanın məşq prosesinə start veriləcək: “Çünki İtaliyada yarışımız olacaq. Komanda həmin yarışa ciddi hazırlaşacaq. Federasiyamızın əsas vəzifəsi çəki dərəcələrində ən yaxşı idmançıları öz hesabımıza yarışa göndərməkdir. Yığma komandamızda bütün çəki dərəcələri üzrə güclü idmançılar var. Mən həmin idmançılara güvənirəm”.
Bakıda kunq-fu üzrə dünya kuboku yarışlarının keçirilməsinin nəzərdə tutulduğunu bildirən N.Aslanov qeyd edib ki, assosiasiyanın təklifi ilə qarışıq idman növləri üzrə festival da təşkil olunacaq: “Bölgələrdə kifayət qədər idmançılarımız var. Düşünürəm ki, bu, idmançılara göstərdiyimiz diqqət və qayğının nəticəsidir. Baş məşqçimiz də çox güclüdür. Bizim baza qarışıq idman növlərinin birləşdiyi bir məkandır. Bir çox idmançı gəlib burada məşq edir. Təbii ki, şəraitin yaxşı olması da idmançılar üçün böyük əhəmiyyət kəsb edir. Məncə, biz bu şəraiti yaratmağa müvəffəq olmuşuq. Bölgələrdə keçirdiyimiz yarışlarda 300-dən artıq idmançı mübarizə aparır. Respublika çempionatında bu rəqəmin 500-dən artıq olacağını düşünürük. Ən fəal bölgə isə cənub zonasıdır. Orada idmanın bu növü ilə məşğul olanların sayı da çoxdur. Həmçinin yerli yarışlara maraq böyükdür. Orada əsas millinin baş məşqçisi Elvin Mustafayev, gənclərdən ibarət yığmanın baş məşqçisi isə Aqil Mustafayevdir. Cənub zonasında əvvəlcə yerli yarış keçirilir və qaliblər respublika çempionatına qatılırlar. Cəlilabadda bu cür kütləvilik Masallı, Astara, Lənkəran və digər bölgələrə də təsir edir. Adətən veteran və kifayət qədər təcrübəyə malik idmançıları regionlara göndəririk. Onlar uşaqlar və gənclər üçün seminarlar keçirirlər. Bunların da kifayət qədər təsiri olur. Həm idmançıların inkişafına, həm də yeni uşaqların müraciətlərinin artmasına gətirib çıxarır”.
Uşaqlarını kunq-fu idman növünə yazdıran valideynlərə müraciət edən federasiya prezidenti bildirib ki, əvvəlcə məşqçini tanımaq lazımdır: “Bu, çox önəmlidir. Çünki məşqçi idman növü ilə yanaşı, onun fəlsəfəsini də öyrətməlidir. Kunq-fu bir neçə idman növünün elementlərini özündə birləşdirir. Döyüş tərəfi idmançını elə formalaşdırır ki, o, bütün növlərdə vuruşa bilir. Komandamızda Daniyel Xolostenko var. İki ildir boksda respublika birincisi olur. Sanda döyüş istiqaməti isə insanı hərtərəfli formalaşdırır. Həm də kunq-funun fəlsəfəsi çox böyük və dərindir. Rauf Əliyev və Rafət Əsədov yeniyetmə və gənclərə idmanın bu növünün fəlsəfi tərəfini öyrədirlər”.
Daun sindromlu uşaqlar üçün də məşqlərin təşkil olunduğunu vurğulayan N.Alsanov qeyd edib ki, həmin onlar da bu ailənin bir üzvləridir: “Mən bu uşaqlara başqa cür yanaşıram. Onlar mənim üçün fərqlidirlər. Çox gözəl nəticələrimiz olur. Onlar həm zalımızın, həm də federasiyamızın sevilən üzvləridir. Çox istərdim ki, belə uşaqlar hər zaman bizim federasiyada mənim rəhbərliyim altında və ya məndən sonra məşqlərini davam etdirsinlər, uğurlu nəticələrlə bizi sevindirsinlər. Çünki onların sevinci bizə xoş təsir göstərir”.
Onun sözlərinə görə, Gənclər və İdman Nazirliyinin təşəbbüsü ilə qadınların özünü müdafiəsi ilə bağlı mütəmadi görüşlər təşkil olunur: “Görüşləri federasiyamızın qızlardan ibarət yığma komandasının baş məşqçisi Anar Süleymanov həyata keçirir. Həmin layihənin aparıcısı kimi federasiyamız seçilib. A.Süleymanov artıq dörd ildir millimizə başçılıq edir. Bu sahədə kifayət qədər təcrübəsi var. Görüşə maraq da böyükdür. Bu da Anar müəllimin əziyyətindən irəli gəlir. O, kunq-funun dərinliklərini fərdi olaraq başa sala bilir. Kimsə döyüşmək, kimsə fəlsəfi hissə ilə məşğul olmaq istəyir. A.Süleymanov məhz bu məqamda həmin istəkləri sezə bilən bir idmançıdır. Xanım idmançı hansı tərəfə uyğundursa, o istiqamətə də yönəldilir. Deyərdim ki, döyüş idman növlərinə meyilli xanımlar daha çoxdur, onların sayı günü-gündən artır. Elə xanımlar var ki, bunu stres atmaq, digərləri özünü müdafiə etmək kimi qəbul edirlər. Ümumilikdə məqsədindən asılı olmayaraq, kunq-fu ilə məşğul olmaq istəyən xanımlar çoxdur”.
Bölmənin digər xəbərləri
