OĞUZDA GÜL BAYRAMI
Ümummilli liderimiz Heydər Əliyevin 85 illik yubileyi münasibətilə Oğuz şəhərində ulu öndərin adını daşıyan parkda gül bayramı keçirilmişdir.
Rayon icra hakimiyyətindən AZƏRTAC-a bildirmişlər ki, rayon rəhbərliyi və şəhər sakinləri əvvəlcə ümummilli lider Heydər Əliyevin parkda ucaldılan abidəsini ziyarət etmiş, önünə gül-çiçək düzmüşlər.
Sonra tədbir iştirakçıları incəsənət həvəskarlarının, məktəblilərin, mədəniyyət işçilərinin, ayrı-ayrı kollektivlərin rəngbərəng güllərdən, bəzək bitkilərindən, yarpaqlardan hazırladıqları əl işlərinə, gözoxşayan tablolara, kompozisiyalara baxmış, balaca rəssamların asfalt üzərində çəkdikləri rəsmlərə tamaşa etmişlər. Ümummilli liderimizə sevgi və məhəbbət, sülhə çağırış, azad səma, Yerə nur saçan Günəş, dövlət rəmzlərimizə hörmət və digər mövzular parkda nümayiş etdirilən əsərlərin ana xəttini təşkil etmişdir.
Bayram iştirakçıları Heydər Əliyev muzeyinə də baş çəkmiş, ümummilli liderimizin həyat və fəaliyyətindən bəhs edən eksponatlara, şəkillərə baxmışlar.
Gül bayramı rəngarəng konsert proqramı və atəşfəşanlıqla başa çatmışdır.
Bölmənin digər xəbərləri
