“OLİMPİYA TƏHSİLİ” SƏRGİSİ AÇILMIŞDIR
AZƏRTAC xəbər verir ki, Milli Olimpiya Komitəsində (MOK) “Olimpiya təhsili” adlı sərgi açılmışdır.
Güləş, atletika, velosiped idmanı, əməkdar məşqçilər, olimpiya oyunları haqqında stendlər, müxtəlif dövrlərdə Azərbaycan idmançılarının qazandığı mükafatların nümayiş olunduğu sərgidə MOK-un vitse-prezidenti Çingiz Hüseynzadə tədbirin əhəmiyyətindən danışaraq, respublikamızda Olimpiya Hərəkatının tarixi barədə məlumat vermişdir.
Daha sonra “Olimpiya dünyası” qəzetinin idman mövzusuna həsr etdiyi foto və inşa müsabiqəsinin qalibləri mükafatlandırılmışlar.
“İdman” qəzetinin əməkdaşı Dilavər Nəcəfov fotomüsabiqənin qalibi olmuşdur.
Azərbaycan Dövlət Bədən Tərbiyəsi və İdman Akademiyasının fotomüxbiri Faiq Rəcəbli ikinci, Lətif Aslanov (“Olimpiya dünyası”) isə üçüncü yeri tutmuşlar. Həvəsləndirici mükafatlar AZƏRTAC-ın əməkdaşı Osman Kərimova və “Futbol dünyası” qəzetindən Eldəniz Bədəlova təqdim olunmuşdur.
İnşa müsabiqəsində 136 nömrəli orta məktəbin 11-ci sinif şagirdi Musa Rzayev fərqlənmişdir. İkinci, üçüncü yerləri isə, müvafiq olaraq, Nuranə Quliyeva (27 nömərəli məktəb) və Zəhra Səlimova (147 nömrəli məktəb) tutmuşlar.
Bölmənin digər xəbərləri
