Ölkəmizdə hər bir sahədə qazanılan uğurlarda gənclərin xüsusi rolu var
Gəncə, 31 yanvar, Rauf Hacıyev, AZƏRTAC
Gəncədə şəhər icra hakimiyyətinin dəstəyi, Gənclər və İdman Baş İdarəsinin təşkilatçılığı ilə 2 Fevral - Gənclər Günü qeyd edilib.
Tədbirdə Gəncə Şəhər İcra Hakimiyyətinin başçısı Niyazi Bayramov, ziyalılar, təhsil, səhiyyə, mədəniyyət, idman sahəsində çalışan fəal gənclər və tələbələr iştirak ediblər.
AZƏRTAC-ın bölgə müxbiri xəbər verir ki, tədbirdən öncə gənclər təşkilatlarının fəaliyyətini və onların nailiyyətlərini əks etdirən sərgiyə baxış keçirilib.
Tədbir Azərbaycan Respublikasının dövlət himninin səsləndirilməsi ilə başlayıb.
Gəncə Şəhər İcra Hakimiyyətinin başçısı Niyazi Bayramov gəncləri təbrik edib, onlara xoş arzularını çatdırıb. Bildirib ki, 1996-cı ildə ulu öndər Heydər Əliyevin Sərəncamı ilə təsdiq olunan bu tarix Ümummilli Liderin gəncliyə göstərdiyi diqqət və qayğının bir nümunəsidir. Ölkəmizdə hər bir sahədə qazanılan uğurlarda gənclərin xüsusi rolu var. Çünki gənclər cəmiyyət həyatının bütün sahələrində təmsil olunmaqla yanaşı, artıq aparıcı qüvvəyə çevriliblər. Azərbaycanda uğurlu dövlət-gənclər siyasəti aparılır. Bu siyasət bir çox dövlətlərə nümunə ola bilər. Prezident İlham Əliyev gənclərlə hər görüşündə, keçirilən forumlarda dəfələrlə bildirib ki, gəncliyə yaradılan imkanlar dövlətimizin sabahı üçündür.
Tədbirdə çıxış edən Gəncə Şəhər Gənclər və İdman Baş İdarəsinin rəisi Müşviq Cəfərov Prezident İlham Əliyevin rəhbərliyi ilə həyata keçirilən dövlət-gənclər siyasətinin Azərbaycan gəncliyinin inkişafına təkan verdiyini vurğulayıb. O bildirib ki, ümumilikdə, şəhərdə gənclərin sayı 93808 nəfərdir. Bu isə şəhər əhalisinin 31 faizini təşkil edir. Gəncədə 3 universitet və 3 kollec fəaliyyət göstərir ki, burada da ümumilikdə, 17213 tələbə təhsil alır. Gəncədə 6 tələbə gənclər təşkilatı (TGT), 4 klub və 9 ictimai birlik fəaliyyət göstərir. Ötən il şəhərdə 165 tədbir və layihə reallaşdırılıb ki, burada da 22 mindən artıq gənc iştirak edib.
Sonra çıxış edən Gəncə şəhər Gənclər Evinin direktoru Amil Qurbanov qeyd edib ki, artıq 2 ildir Gəncə şəhər Gənclər Evi fəaliyyət göstərir. Ölkədə olan Gənclər evlərinin əsas məqsədi gənclərin təşəbbüslərinin dəstəklənməsi və inkişaf etdirilməsi üçün şəraitin yaradılmasından, gənclərin şəxsiyyət kimi yetişməsinə kömək etməkdən ibarətdir. Bu istiqamətdə Gəncədə də bir sıra tədbirlər görülür. Belə ki, Gəncə şəhər Gənclər Evində bu günə kimi 200-dən artıq tədbir reallaşıb. Burada gənclərin asudə vaxtının səmərəli təşkili üçün müxtəlif dərnəklər, kurslar və klublar fəaliyyət göstərir.
Tədbirdə söz alan “Gələcəyə Körpü” Gənclər İctimai Birliyinin icraçı direktoru Hüseynxan Hacızadə, Gəncə Musiqi Kollecinin TGT sədri Lalə Məmmədova, Azərbaycan Dövlət Aqrar Universitetinin TGT sədri Valeh Əsədov gənclər üçün yaradılan şəraitdən söz açıb, onlara göstərilən diqqət və qayğıya görə Prezident İlham Əliyevə və birinci xanım Mehriban Əliyevaya minnətdarlıqlarını bildiriblər.
Sonda Gəncə şəhərinin ictimai həyatında fəal iştirakına görə və 2 Fevral - Gənclər Günü münasibətilə bir qrup gənc şəhər icra hakimiyyətinin fəxri fərmanı ilə təltif olunub.
Bölmənin digər xəbərləri
