Ölkəmizdə qan donorluğunun inkişafı istiqamətində əməkdaşlıq memorandumu imzalanıb
Bakı, 9 avqust (AZƏRTAC). Avqustun 9-da “Odlar Yurdu” Gənclər İctimai Birliyi və “Qan Donorları Assosiasiyası” İctimai Birliyi arasında respublikada qan donorluğunun inkişafı istiqamətində birgə əməkdaşlıq memorandumu imzalanıb.
Qan Donorları Assosiasiyasından AZƏRTAC-a bildirdilər ki, memorandumun məqsədi yaxın gələcəkdə paytaxtla bərabər Gəncə şəhərində də gənclərin qan donorluğuna cəlb olunması, maarifləndirilməsi və gənclər arasında qan donorluğu mədəniyyətinin formalaşdırılması istiqamətində birgə əməkdaşlığın əldə olunmasıdır.
Memorandumu “Odlar Yurdu” Gənclər İctimai Birliyinin sədri Nigar Ələsgərova və Qan Donorları Assosiasiyasının sədri Fuad Əsgərov imzalayıblar.
Qan Donorları Assosiasiyası artıq 5 ilə yaxın müddətdir ki, respublikada qan donorluğunun inkişafı sahəsində fəaliyyət göstərir və gənclərin könüllü qanvermələrə cəlb olunması üçün məqsədyönlü layihələr həyata keçirir. Birliyin hədəfi gənclərin bu layihələrdə fəal sürətdə iştirakını təmin etməkdir.
Bölmənin digər xəbərləri
