Ötən ay Qəbələdə olan əcnəbi turistlər arasında hindistanlılar üstünlük təşkil edib
Qəbələ, 13 fevral, Mustafa Dadaşov, AZƏRTAC
Bu ilin yanvarında Qəbələ rayonundakı otel və mehmanxana tipli müəssisələrə 5669 nəfər yerli və əcnəbi turist yerləşdirilib. Onların 3303 nəfəri və ya 58,3 faizi Azərbaycan, 2366 nəfəri və ya 41,7 faizi xarici ölkə vətəndaşı olub.
Bu barədə AZƏRTAC-ın bölgə müxbirinə Qəbələ Rayon Statistika İdarəsindən məlumat verilib.
Bildirilib ki, yanvarda Qəbələnin otel və mehmanxana tipli müəssisələrinə yerləşdirilən yerli və əcnəbi turistlərin sayı 2023-cü ilin eyni dövrü ilə müqayisədə 198 nəfər və ya 3,6 faiz artıb. O cümlədən, əcnəbi turistlərin sayında 184 nəfər və ya 8,4 faiz artım qeydə alınıb.
İdarədən verilən məlumata görə, cari ilin yanvarında Qəbələyə gələn əcnəbi turistlər arasında Hindistan vətəndaşları üstünlük təşkil edib. Belə ki, ilin birinci ayında bu ölkənin 608 vətəndaşı Qəbələdə olub. Ümumiyyətlə, ötən ay Qəbələyə Səudiyyə Ərəbistanından 449, Birləşmiş Ərəb Əmirliklərindən 357, Küveytdən 249, Omandan 112, Pakistandan 87, Rusiyadan 71, Qətərdən 56, Türkiyədən isə 22 turist səfər edib.
Bundan əlavə, yanvarda Qəbələyə digər ölkələrdən də müəyyən sayda əcnəbi turist gəlib.
Bölmənin digər xəbərləri
